Kryeministri i Kosovës, Albin Kurti, në ceremoninë e Rreshtimit të Kuadrateve të FSK-së, të mbajtur në Kazermën “Adem Jashari” në Prishtinë tha se që nga viti 1989, nuk ka pasur ushtri më të fortë e më të trajnuar.
Kurti theksoi se më 6 mars të vitit 199 u përgatit shënimi i Epopesë së UÇK-së, ku ishte paraparë edhe rreshtimi i njësiteve ushtarake.
“Që nga çlirimi i atdheut tonë, në qershor 1999 dhe deri më sot e tutje, një nga detyrat kyçe për ruajtjen e lirisë së fituar me gjakun e dëshmorëve dhe martirëve të popullit tonë, ka qenë dhe vazhdon të mbetet fuqizimi i Ushtrisë së Kosovës. Prandaj sot, me ngazëllim mund të konstatojë që qysh nga viti 1989 kur Adem Jashari me shokë filluan të flasin e të punojnë për një Ushtri të Kosovës dhe deri sot, kurrë nuk kemi pasur një ushtri më të fortë, më të armatosur, më të pajisur dhe më të trajnuar sesa sot”, është shprehur Kurti.
Kurti tha se FSK së shpejti do të bëhet edhe prodhuese e municioneve ushtarake.
Në kazermën “Adem Jashari” është organizuar ceremonia e rreshtimit të kuadrateve të Forcës së Sigurisë së Kosovës, në shënim të Epopesë së Ushtrisë Çlirimtare të Kosovës.
5,6 dhe 7 marsi njihet si Epopeja e Ushtrisë Çlirimtare të Kosovës, ku u vranë 59 anëtarë të familjes Jashari pas rezistencës treditore të forcave të armatosura serbe./teve1.info/
