Kryeministri i Kosovës, Albin Kurti,nuk ka dhënë detaje se çfarë përmban drafti i pesë emisarëve për Asociacionin, i cili u propozua më 21 tetor.
Kurti thotë se e respektojnë kërkesën e emisarëve që të mos flasin për të, derisa tha se që emisarët kanë deklaruar që ky propozim është shkruar me kujdes duke pasur parasysh Kushtetutën dhe ligjin e Kosovës.
“Sa i përket këtij propozimi ne e respektojmë kërkesën e pesë emisarëve derisa të na kërkohet që të mos flasim konkretisht për të. Por, më e rëndësishmja është që emisarët kanë deklaruar që e kanë shkruar me kujdes duke parë pasur parasysh Kushtetutën dhe ligjin dhe se përgjigjen për çfarëdo dilema mund ta jap Gjykata Kushtetuese”, tha Kurti në një konferencë për media, raporton teve1.info
Tutje, kryeministri tha se komuniteti serb në Kosovë nuk duhet ta harrojë se sa shumë ka bërë Kosova për ta.
“Por, për bindjen tonë të fuqishme vetëmenaxhimi i komunitetit serb në Kosovë nuk do të duhej asnjëherë ta harrojë se sa shumë tashmë ka bërë Republika e Kosovës për serbët në Kosovë, të drejta të cilat janë të pashembullta edhe në vetë Evropën, ndërkohë që kemi dëgjuar shpesh se flitet për modele evropiane të zgjidhjes”, deklaroi ai./teve1.info/
