Kryeministri i Kosovës, Albin Kurti, sot ka qenë i urdhëruar nga Gjykata Themelore të japë një dëshmi në Prokurorinë Speciale të Kosovës, nga ora 10:00, por ai nuk është paraqitur atje.
Në atë kohë, Kurti mori pjesë në përurimin e një çerdhe në Gjilan.
Nga atje, Kurti tha se asnjëherë nuk ka refuzuar që të jap dëshmi, por e ka ripërsëritur ftesën që prokurorët të marrin dëshminë e tij nga zyra e shtetit.
“Unë asnjëherë nuk kam thënë që nuk do të jap dëshmi apo të refuzoj të dëshmoj, përkundrazi kam thënë se jo vetëm që jam i gatshëm, por edhe i interesuar që të dëshmoj. Në anën tjetër kam shkruar letrën me të cilën kam shkruar oraret se kur mund të bëhet. Unë e mirëpres Prokurorinë në zyrën e shtetit. Ka pasur raste edhe në të kaluarën, kur prokurorët, hetuesit, kanë ardhur për kryeministra, madje jo vetëm si dëshmitarë, por edhe si të pandehur. Prandaj, nuk ka arsye që kjo të mos vazhdohet”, tha kryeministri gjatë përurimit të çerdhes në Gjilan.
Sipas Kurtit, Prokuroria në qoftë se do ta kishte të rëndësishme dëshminë e tij, do të shkonte në zyre për ta marrë. Por, siç deklaron Kurti, Prokuroria nuk është e interesuar për të sjell drejtësi.
“Qysh në muajin dhjetor, ka qenë e mundur që të kryhet ky intervistim dhe të jepet dëshmia nga ana ime. Nëse Prokuroria e ka pasur shumë të rëndësishme dëshminë time, ajo do të vinte te ne. Një prokuror që e ka synim kryesor dëshminë e dëshmitarit, ai nuk humb kohë. Pse i humbi Prokuroria tre muaj? Për bindjen time të fuqishme, për shkak se është më shumë e interesuar të mbush ballinat e ndonjë portali të ndonjë oligarku, sesa të sjell drejtësi. Kurrë Prokuroria e Shtetit në Kosovë nuk ka qenë më e lirë për të vepruar, fatkeqësisht lirinë po e keqpërdor për ta luftuar Qeverinë dhe jo krimin e korrupsionin”, tha ai.
Javën e kaluar, Zyra e Kryeministrit i ishte drejtuar përmes një letre Gjykatës Themelore në Prishtinë, duke kërkuar që ta obligojë Prokurorinë Speciale që të marrë dëshminë e kryeministrit të Kosovës, Albin Kurti, lidhur me rezervat shtetërore brenda zyrës së tij në Qeveri./teve1.info/
Kurti mbërrin në Gjilan, nuk i përgjigjet urdhrit të Gjykatës për të dhënë dëshminë
Kurti nuk i përgjigjet urdhrit të Gjykatës për të dhënë dëshminë
