Kryeministri i Republikës së Kosovës, Albin Kurti e ka pritur në takim të dielën sulmuesin Albion Rrahmanin. Kurti ka pasur fjalë të mëdha për sulmuesin e Kosovës dhe Rapidit të Bukureshtit.
“Sot u takuam me të dhe babin e tij, Driton Rrahmani, njëherësh ikonën e futbollit të Kosovës gjatë viteve të 90-ta, i cili me shumë pasion po vazhdon ta mbështesë të birin në karrierën e tij në futboll. Me talentin e trashëguar nga familja dhe me punën e tij të pandalshme, Albioni në Superligën rumune sivjet ka shënuar 14 gola në vetëm 16 ndeshje të zhvilluara, duke ecur me hapa të sigurt për t’u bërë golashënuesi më i mirë i kampionatit. Albionit i urova shumë suksese tutje, në veçanti në ndeshjet që do t’i zhvillojë me fanellën e Kosovës”, ka shkruar Kurti.
Rrahmani është pjesë e Kosovës për dy ndeshjet miqësore të këtij muaji. Më 22 mars, Kosova luan në Yerevan ndaj Armenisë, ndërsa tri ditë më vonë përballet me Hungarinë në Budapest.
Rrahmani i ka dy paraqitje me “Dardanët”, ndërsa këtë edicion po shkëlqen me fanellën e Rapidit,ku ka shënuar 13 golanë 15 paraqitje në Superligën e Rumanisë.
