Kryeministri i Kosovës, Albin Kurti, është deklaruar pas takimit që pati me kryeministrin e Maqedonisë së Veriut, Hristijan Mickosk.
Kryeministri deklaroi se në takim janë diskutuar disa tema me rëndësi për të dyja shtetet.
“Kishim një mori çështje e tema që diskutuam që janë për të mirën e dyanshme e të përbashkët. Kosova dhe Maqedonia kanë marrëdhënie të mira bilaterale, bazuar në vlera të përbashkëta me synim të qartë për integrim evropian. Urojmë që sa më shpejtë t’i fillojmë negociatat për në BE”, tha Kurti.
Gjithashtu, Kurti tha se bashkëpunimi ndërmjet Kosovës dhe Maqedonisë së Veriut është edhe në fushën e sigurisë dhe mbrojtjes.
Gjatë deklarimit Kurti ka përmendur edhe incidentin që i ka ndodhur presidentes së Kosovës, Vjosa Osmani në Aeroportin e Shkupit, duke thënë se ka qenë përvojë e rëndë që ka përjetuar Osmani.
“Pa dyshim ka qenë përjetim dhe përvojë e rëndë e presidentes Vjosa Osmani, me 02 gusht në Aroportin e Shkupit, ka qenë me familje dhe me dy vajza të vogla. Autoritet e Maqedonisë së Veriut, krerët e shtetit këtu kanë shprehur keqardhjen e tyre. Do të ketë raport zyrtar që do ta zbardhë këtë çështje në tërësi dhe hollësi, dhe ta kuptojmë se çfarë ka ndodhur dhe mos të përsëritet kurrë më një situatë e tillë”, potencoi ai.
Presidenca e Kosovës tha se Osmanit iu kërkua të skanohej telefoni nga stafi i aeroportit. Presidenca kishte reaguar ndaj këtij incidenti e derisa autoritetet kosovare ka dërguar notë proteste. /teve1.info/
