Kryeministri në detyrë i Kosovës, Albin Kurti, ka pritur në takim Apostullin Eric Kwabena Nyamekye nga Republika e Ganës.
Siç njofton Zyra e Kryeministrit, gjatë takimit, Kurti ka shprehur mirënjohjen për interesimin për thellimin e bashkëpunimit ndërmjet Republikës së Kosovës dhe Republikës së Ganës.
Ai ka vënë në pah zhvillimin demokratik, shoqëror dhe ekonomik të Republikës së Kosovës, si dhe angazhimin e Qeverisë për ruajtjen dhe promovimin e vlerave demokratike, dimensionit shumëkulturor dhe bashkëjetesës fetare, si elemente kyçe për zhvillimin e qëndrueshëm të shoqërisë.
Po ashtu, Kurti ka nënvizuar përkushtimin e Qeverisë për ndërtimin dhe forcimin e urave të bashkëpunimit dhe komunikimit me Republikën e Ganës dhe vendet e tjera të kontinentit afrikan, duke shprehur gatishmërinë për avancimin e bashkëpunimit në fushat e kulturës, dialogut ndërfetar dhe zhvillimit ekonomik.
“Apostulli Dr. Eric Kwabena Nyamekye, Kryetar i Kishës së Pentekostit në Akra të Ganës, po qëndron për herë të parë në vizitë në Kosovë, me rastin e pjesëmarrjes në Konferencën e Parë Ballkanike të Kishës së Pentekostit, e cila u mbajt në Prishtinë”, theksohet në komunikatë.
