Kryeministri i Kosovës, Albin Kurti ka reaguar lidhur me doracakët e edukimit seksual.
Kurti ka thënë se këta doracakë nuk kanë qenë asnjëherë qenë kurrikulë, as tekste shkollore, as lëndë obligative.
Madje ai ka thënë se hartimi i këtyre doracakëve kishte filluar në vitin 2016 dhe miratuar në vitin 2020.
Kurti ka akuzuar partitë politike se po bëjnë politikë me fëmijët dhe familjen, Qeveria e tij ka bërë politika për familjen dhe fëmijët.
“Doracakët në fjalë, asnjëherë nuk kanë qenë kurrikulë, as tekste shkollore, as lëndë obligative, as tekst obligativ apo tekst për nxënës. Në fund e kuptuam që po i njëjti doracak kishte filluar hartimin në vitin 2016 (kur ministër i Arsimit ishte Dr. Arsim Bajrami nga PDK), e ishte i miratuar në vitin 2020 (kur ministre e Arsimit ishte Dr. Hykmete Bajrami nga LDK), dhe në vitin 2023 është publikuar në faqen e MAShTI-t. Pra, jo në nëntorin e vitit 2024 por në gusht të vitit 2023. Përderisa ata bëjnë politikë me fëmijë dhe familje, ne kemi bërë politika për fëmijët dhe familjen. Fëmijëve po u ndajmë shtesa për herë të parë që prej pasluftës”, ka shkruar Kurti.
Kurti ka thënë se kanë shprehur gatishmëri për rishikimin e këtyre doracakëve pas shqetësimit nga prindërit të cilët i ka falënderuar për shqetësimet e ngritura.
“E megjithëkëtë në mesin e këtij diskutimi disa ditorë ka pasur edhe prind e individë me shqetësime të sinqerta, të cilëve ju falënderoj që i keni bërë të zëshme vërejtjet e juaja. Në reagimin tonë të parë institucional ne kemi shprehur gatishmërinë për të rishikuar përmbajtjen që nuk e kanë gjuhën e përshtatshme, dhe nuk përputhen me kontekstin apo standardet e edukimit. Të premten, Ministria e jonë e Arsimit, Shkencës, Teknologjisë dhe Inovacionit, ka nxjerrë vendim për largim nga përdorimi i doracakëve ndihmës për mësimdhënës dhe rishikimin e tyre, me ç’rast në komisionin përkatës do të jenë të ftuar të gjitha palët relevante, përfshirë natyrisht edhe Këshillin e Prindërve të Kosovës”, ka shkruar Kurti.
Doracakët për lëndën seksuale ngjallën reagime të mëdha, pasi këtë çështje e ngriti deputeti i pavarur Eman Rrahmani.Ministria e Arsimit ditë më parë njoftoi se ka shfuqizuar këta doracakë për t’i rishikuar.
