Kryeministri në detyrë, Albin Kurti, ka paralajmëruar se, përveç balotazhit në zgjedhjet lokale të 9 nëntorit, Kosova mund të përballet edhe me dy palë zgjedhje të reja parlamentare, në dhjetor dhe në pranverë.
Gjatë një konference për media, Kurti ka theksuar se zgjedhja e presidentit të ri në pranverë mund të sjellë përsëri zgjedhje për vendin.
Ai ka shtuar se do të ishte më e dëshirueshme që zgjedhjet në dimër të shmangeshin dhe të mbahej vetëm një raund zgjedhjesh në pranverën e ardhshme.
“Nga ajo që dëgjuam dje dhe duke u bazuar në rrethanat që ekzistojnë, duket se të gjithë tani janë të përgatitur jo vetëm për balotazh, por edhe për zgjedhje të reja parlamentare. Mbase është për të ardhur keq që mund të kemi dy herë zgjedhje: një në dimër dhe një tjetër në pranverë. Kur nuk arritëm t’i bëjmë 61 deputetë për të formuar një qeveri të re, është vështirë e imagjinueshme që mund të bëjmë kollaj 80 deputetë në pranverën e vitit të ardhshëm dhe i kemi vetëm 4 muaj deri te zgjedhja e presidentit apo presidentes. Kemi pasur mundësi që këto zgjedhje të dhjetorit t’i evitojmë dhe t’i mbajmë vetëm në pranverë”, ka thënë Kurti.
Ndryshe, të dielën qeveria “Kurti 3” e propozuar nga mandatari Albin Kurti mori vetëm 56 vota në Kuvendin e Kosovës, pesë më pak se 61 votat e nevojshme.
Ndërkohë, presidentes Vjosa Osmani i mbaron mandati në prill të vitit 2026.
Presidenti zgjidhet me dy të tretat e votave të 120 deputetëve sa i ka gjithsej Kuvendi.
Në rast se kandidati nuk i merr këto vota në dy rundet e para, në rundin e tretë zgjidhet me votat e gjysmës së deputetëve.
Në rast se nuk zgjidhet as në rundin e tretë, atëherë Kuvendi shpërndahet dhe shpallen zgjedhjet e reja.
