Kryeministri i Kosovës, Albin Kurti, ka përkujtuar 24-vjetorin e Epopesë së “Çabratit” të Gjakovë.
Kurti tha se më 7 maj të vitit 1999, Çabrati i Gjakovës agoi nën rrethimin e forcave të shumta të Serbisë.
“Në mbrojtje të civilëve doli Brigada 137 “Gjakova”. Luftimet e ashpra mes Ushtrisë Çlirimtare të Kosovës dhe forcave serbe vazhduan deri më 11 maj. Në këto ditë maji të vitit 1999, në Çabrat e në rrethinat e qytetit, ranë 26 dëshmorë e më shumë se 100 martirë. Mbi 350 civilë të moshave të ndryshme u rrëmbyen me dhunë. Shumë prej tyre u mbajtën peng në burgje të ndryshme”, ka shkruar Kurti përmes një postimi në Facebook.
Kryeministri, ka kujtuar djemtë dhe vajzat që luftuan në betejë, duke thënë se kujtojmë çdo ditë sakrificat e mëdha për çlirim.
“I përjetshëm qoftë kujtimi për 1022 martirët dhe 361 ushtarët dëshmorë të Gjakovës! Lavdi të gjithë të rënëve për lirinë e Kosovës!”. /teve1.info/
