Kryeministri Albin Kurti ka thënë që ushtrimi ndërkombëtar që po zhvillohet në Kosovë, Defender Europe 2023 dëshmon vullnetin e Kosovës, jo vetëm për ta zhvilluar sistemin e vet të mbrojtjes por edhe për të qenë pjesë e sistemit të vendeve demokratike.
“Pa dyshim, ushtrimi Defender Europe 2023 është ngjarja më e madhe stërvitore ushtarake që ka ndodhur ndonjëherë në Kosovë. Republika jonë sot është e nderuar që për herë të dytë është vend nikoqir i ushtrimit që shtrihet prej zonës së Mesdheut e deri në kufijtë lindorë të kontinentit tonë. Forca e Sigurisë së Kosovës në këtë ushtrim radhitet e katërta në mesin e 25 ushtrive pjesëmarrëse, sa i përket numrit të personelit të angazhuar në këtë ushtrim. Kjo dëshmon për vullnetin që kemi për të zhvilluar sistemin tonë të mbrojtjes por edhe përkushtimin tonë të palëkundër për të qenë pjesë e sistemit të përbashkët të mbrojtjes së vendeve që përfaqësojnë vlerat demokratike”.
Kurti ka thënë se përgatitja për t’u përballuar me kërcënimet e njohura e ato të paparashikueshme, është e domosdoshme.
“Siguria e kontinentit evropian është interes jetik i yni, si shtet që beson në atë që e don: të drejtat e njeriut dhe sundimin e ligjit, paqen dhe demokracinë. Defender Europe 2021 ishte më pak se një vit para se Rusia të shpërfaqë në mënyrën më agresive e brutale synimet e saj të kahmotshme për t’u shtrirë dhunshëm në thellësi të Evropës. Defender Europe 23 po zhvillohet në një realitet të tensionuar 15 muaj pas invazionit dhe ka të bëjë drejtpërdrejt jo vetëm me të ardhmen e Evropës por me të mbarë botës. Prandaj përgatitja për t’u përballur me kërcënimet e njohura por edhe me ato të paparashikueshme, është e domosdoshme”, ka deklaruar ai.
