Kryeministri i Kosovës, Albin Kurti, në një intervistë për të përjavshmen britanike “The Sunday Times“, ka shprehur shqetësimin se gjyqi ndaj ish-krerëve të Ushtrisë Çlirimtare të Kosovës mund ta ndihmojë Serbinë të “rishkruajë historinë”, duke e zhvendosur fokusin nga krimet dhe mizoritë serbe gjatë luftës së fundit.
“Unë e mbështes llogaridhënien për luftën. Megjithatë, më duket e padrejtë që në qendër të vëmendjes po vihet Kosova, ndërsa Serbia jo vetëm që ka refuzuar të marrë përgjegjësinë për krimet e saj, por edhe i mohon ato”, tha Kurti.
Kurti theksoi se populli i Kosovës nuk do ta harrojë kurrë rolin e Mbretërisë së Bashkuar në çlirimin e Kosovës dhe intervenimin e NATO-s, ndërsa shtoi se do t’i bëhej qejfi sikur ish-kryeministri britanik, Tony Blair, të mund të vinte në Prishtinë për të festuar “Ditën e Çlirimit”.
“Ne kurrë nuk do ta harrojmë rolin e veçantë që kishte Mbretëria e Bashkuar në ndërhyrjen e NATO-s për të ndaluar gjenocidin serb”, tha Kurti, duke shtuar se ai shpreson që ish-kryeministri britanik të mund vinte për të festuar “Ditën e Çlirimit” në qershor.
Kurti në këtë intervistë tha se Rusia ka parë në Kosovë dhe në Ballkanin Perëndimor mundësinë e një hapje të një “fronti të dytë” kundër NATO-s pas pushtimit të Ukrainës. “Kosova është një histori suksesi e NATO-s, rusët duan që ajo të dështojë”.
Në dhjetor, kujtoi ai, një grup i madh anëtarësh të “Patrulla e Popullit”, një organizatë nacionaliste serbe me lidhje me grupin paramilitar rus “Wagner”, u grumbulluan përreth kufirit me Kosovën, duke kërcënuar se do të përballeshin me trupat e NATO-s, transmeton Albanian Post.
“Njëqind milje nga vendi ku po bëjmë këtë intervistë në zyrën e kryeministrit është një bazë ruse”, shtoi Kurti, duke iu referuar të ashtuquajturës “qendër humanitare” e Moskës në qytetin serb të Nishit. “Është plot me spiunë dhe agjentë që angazhohen në luftë hibride”.
Ndryshe, gjyqi ndaj ish-krerëve të UÇK-së, nisi të hënën e 3 prillit, pas më shumë se dy vjet nga konfirmimi i aktakuzës. Për tri ditë palët mbajtën deklaratat e tyre hyrëse për rastin e Hashim Thaçit, Kadri Veselit, Jakup Krasniqit dhe Rexhep Selimit.
Dhomat e Specializuara të Kosovës me seli në Hagë, shpalosën aktakuzën kundër katër ish-drejtuesve të UÇK-së, përkatësisht ndaj Shtabit të Përgjithshëm së një ushtrie të një populli të dërrmuar nga shtypja njëshekullore e Serbisë, që nga Zyra e Prokurit të Specializuar u barazvlerësua me një “ndërmarrje të përbashkët kriminale”.
