Kryeministri në detyrë i Kosovës, Albin Kurti, ka bërë të ditur përmes një postimi në rrjetin social X (ish-Twitter) detaje nga takimi i tij me presidenten e Komisionit Evropian, Ursula von der Leyen, e cila qëndroi për vizitë zyrtare në Prishtinë të martën.
Në postimin e tij, Kurti thekson se gjatë takimit është riafirmuar përkushtimi i Kosovës për integrimin në Bashkimin Evropian, duke e lidhur këtë synim me përparimin demokratik dhe ekonomik të vendit.
“Ishte kënaqësi e madhe ta mirëpres Presidenten e Komisionit Evropian, Ursula von der Leyen, në Kosovë dje, ku ndër të tjera, riafirmuam përkushtimin tonë për t’u anëtarësuar në Bashkimin Evropian – një qëllim që pasqyrohet edhe në forcimin e demokracisë sonë dhe në rritjen e ekonomisë, veçanërisht gjatë katër viteve e gjysmë të fundit,” ka shkruar Kurti.
Kryeministri në detyrë ka theksuar se me presidenten e KE-së kanë diskutuar edhe për thellimin e bashkëpunimit ndërmjet Kosovës dhe BE-së në fusha kyçe për zhvillimin e vendit.
“Diskutuam gjithashtu për forcimin e bashkëpunimit tonë, veçanërisht në fushat e teknologjisë së informacionit dhe komunikimit, mbrojtjes dhe bujqësisë, të cilat paraqesin potencial të madh për të dyja palët. Presim të punojmë ngushtë së bashku për të arritur objektivat tona të përbashkëta,” ka theksuar Kurti.
Ai përmbylli reagimin e tij duke ritheksuar përkushtimin e Kosovës për të qenë një partnere e besueshme e Bashkimit Evropian.
“Kosova mbetet e përkushtuar për të punuar ngushtë me Bashkimin Evropian në realizimin e objektivave të përbashkëta,” ka shkruar Kurti në X.
Vizita e presidentes së Komisionit Evropian në Kosovë është pjesë e një turi në rajon, ku ajo po diskuton për Planin e Rritjes për Ballkanin Perëndimor dhe integrimin evropian të vendeve të rajonit.
