Kryeministri i Kosovës, Albin Kurti, ka komentuar vendimin e Komiteti Evropian i Rajoneve për të hequr nga përdorimi fusnotën “Kosovo*”, duke e krahasuar këtë zhvillim me shkrirjen e një fjolle bore.
Kurti tha se ky zhvillim tregon një klimë më pozitive në raport me Kosovën, ndonëse sipas tij vendi ende përballet me sfida që burojnë nga e kaluara.
“Duket që sivjet pranvera po vjen më herët dhe, siç u tha atëbotë, fusnota do të shkrihet si një fjollë bore. Ndoshta ishte gabim viti dhe qeveria, por kjo po ndodh”, deklaroi Kurti.
Megjithatë, ai theksoi se Kosova vazhdon të përballet me pasoja nga politikat e mëparshme.
“Natyrisht që kemi ende trashëgimi të keqe nga ajo kohë dhe nuk do të duhej të entuziazmohemi tepër. Pengesat, problemet dhe sfidat kryesore që i kam pasur gjatë negociatave në Bruksel vijnë pikërisht prej trashëgimisë së mbrapshtë që na kanë lënë qeveritë pararendëse”, u shpreh kryeministri.
Sipas tij, institucionet e Kosovës po punojnë për t’i tejkaluar këto vështirësi dhe për të avancuar procesin e integrimit evropian.
“Ne po punojmë me krejt çfarë dimë e mundemi, me shumë zell dhe durim që ato të eliminohen. Besoj që në Bruksel është një atmosferë pozitive që Kosova të bëjë hapa përpara”, tha Kurti.
Ai shtoi se dy hapat më të rëndësishëm për Kosovën në rrugën drejt Bashkimit Evropian janë marrja e pyetësorit nga Komisioni Evropian dhe avancimi drejt statusit të vendit kandidat në Bashkimi Evropian.
Kurti gjithashtu përmendi edhe zhvillimet lidhur me presidencën e radhës në BE.
“Tash është presidenca e Qipro në BE. Prej 1 korrikut fillon presidenca e Irlandë dhe këto ditë kemi edhe ambasadorin e Irlandës që mbulon Kosovën nga Budapesti në vendin tonë”, theksoi ai.
