Kryeministri i vendit, Albin Kurti, ka reaguar pas djegies së lokalit të nënkryetares së Komunës së Zveçanit, Natasha Tomaniq.
Përmes një postimi në Facebook, Kurti ka shkruar se përgjigja ndaj akteve të tilla dhe personave përgjegjës, duhet të jetë sundimi i ligjit dhe shteti i së drejtës.
Njëherit, kryeministri ka thënë se Dita Ndërkombëtare e Gruas, duhet të shënohet me mirënjohje, përkujdesje e dashuri, por asnjëherë me dhunë e terror, duke iu referuar djegies së pronës private të nënkryetares së Zveçanit.
“Pikërisht me 8 Mars, elemente kriminale në Zveçan zgjodhën e rizgjodhën dhunën, terrorin dhe sulmin, kësaj radhe ndaj pronës private, dyqanit të nënkryetares së Komunës së Zveçanit, znj. Natasha Tomaniq. Ky duket të jetë “urimi” i tyre për 8 Mars për nënkryetaren Tomaniq dhe për të gjithë serbët që duan integrimin në Kosovë, çlirimin nga strukura kriminale që kërcënojnë dhe pavarësimin nga Beogradi zyrtar që i shantazhon. Dita Ndërkombëtare e Grave shënohet me mirënjohje, përkujdesje, dashuri e angazhim të përbashkët për barazi. Jo me dhunë e terror. Përgjigjja ndaj akteve të tilla dhe personave përgjegjës është sundimi i ligjit dhe shteti i së drejtës”, thuhet në postimin e Kurtit.
Iu dogj lokali, nënkryetarja e Zveçanit: Dyshoj në Severna Brigadën dhe në Listën Srbska
