Kryeministri në detyrë i Kosovës, Albin Kurti, të shtunën ka marrë pjesë në organizimin e Lidhjes Qytetare Shqiptaro-Amerikane në shënim të ditëlindjes së 85-të të ish-kongresistit amerikan, Joseph DioGuardit, si dhe bashkëshortes së tij, Shirly që sivjet feston ditëlindjen e 75-të.
Kurti ka vlerësuar kontributin e DioGuardit për çështjen e Kosovës në politikën amerikane, duke thënë se ai ka luajtur një rol qendror për zërin e shqiptarëve në një kohë vendimtare për Kosovën.
Sipas tij, DioGuardi ishte personi që u hapi dyert e politikës amerikane shqiptarëve, në një kohë kur, siç është shprehur ai ‘pak njerëz ishin të interesuar të dëgjonin për vuajtjet e kosovarëve në ish-Jugosllavi’.
“Çdo shqiptaro-amerikan, pavarësisht pikëpamjeve apo përkatësive politike, e pranon këtë të vërtetë të thjeshtë: Joe DioGuardi luajti një rol qendror në sjelljen e zërit të shqiptarëve në politikën amerikane në një kohë vendimtare për Kosovën. Ai ishte personi që u hapi dyert e politikës amerikane shqiptarëve, kur jo shumë njerëz ishin të interesuar të dëgjonin për vuajtjet tona në ish-Jugosllavi”, ka shkruar Kurti në Facebook.
Më tej, Kurti ka theksuar se përveç DioGuardit, një rol të veçantë ka pasur edhe bashkëshortja e tij, Shirley DioGuardi, e cila, sipas Kurtit, ka qenë gjithmonë pranë tij në përpjekjet për çështjen e Kosovës.
“Teksa ai qëndronte në krah të vërtetës dhe popullit tonë, përkrah tij qëndronte bashkëshortja e tij, Shirley. Bashkë, lobuan te Presidenti Clinton për të ndaluar gjenocidin në Kosovë, duke u siguruar që Bosnja të mos përsëritej; mbrojtën UÇK-në si një ushtri çlirimtare me një kauzë të drejtë; bindën administratën Bush se pavarësia e Kosovës nuk duhej të vonohej dhe në vitin 2008 kjo u bë realitet; dhe deri më sot, kanë punuar pa u ndalur në Uashington DC për t’u siguruar që përgjegjësia të vendoset aty ku i takon, mbi ata që minojnë paqen dhe sigurinë. Veprat e tyre janë shembulli i shkëlqyer se çfarë dy amerikanë, të udhëhequr nga ndërgjegjja dhe miqësia, mund të bëjnë për një popull që lufton për lirinë e tij”, ka përfunduar ai./teve1.info/
