Kryeministri i Kosovës, Albin Kurti, në shtatë vjetorin e vdekjes së Astrit Deharit, tha se u mbytë në burg e ku aty po mbahej padrejtësisht.
Kurti, para mbledhjes së Lëvizjes Vetëvendosje ishte në homazhe për aktivistin Dehari, ku tha se drejtësia për të mund të vonojë, por që do të vijë.
“Sot është data 5 nëntor dhe në po vijmë këtu pasi ishim në homazhe për aktivistin tonë të paharruar, Astrit Deharin, i cili u mbytë ne burg, ku po mbahej padrejtësisht, për arsye politike 7 vjet më parë. Fakti se Kosova ka djem e vajza, aktivist e aktivistë, shoqe e shokë të Astrit, na jep sigurinë se drejtësinë do ta kemi, ajo mund të vonojë e mund të pengohet nga jashtë e nga brenda sistemit, por nuk do të harrojë e nuk do të harrohet”.
Ai tha që Dehari ka qenë student i shkëlqyer i mjekësisë me rezultate shumë të larta.
“Astriti ka qenë i pasionuar pas fushës së tij studimore, por ka qenë edhe aktivist i mjekësisë. Astriti sot i mungon Lëvizjes, si një aktivist i palodhshëm e i patrembur që ka qenë, por ai i mungon edhe Kosovës, sepse sot do të ishte një mjek i ri shumë i përgatitur në spitalet tona e në politikëbërjen e shëndetësinë për Kosovën”.
“E pra nëse e respektojmë Astritit, nuk mjaftojnë lulet, fjalët e bukura dhe as shkrimet për të, sidomos nga ju aktivistë të ri në Rininë për Vetëvendosje, sepse tani pritet nga ju të studioni mirë me rezultate sa më të larta, por edhe ta afroni punën tuaj vullnetare në të mirë të komunitetit dhe popullit tonë. Vetëm kështu jemi të gjithë Astrita, duke kërkuar nga vetja maksimumin, duke dashur profesionin dhe studimet tona, por njëkohësisht duke dashur edhe popullin nga vijmë dhe që i përkasim”, shtoi kryeministri./teve1.info/
