Kurti nuk dha ndonjë detaj më shumë rreth këtij deklarimi.
“Një sindikatë që i kërkon 100 euro dhe i ka marrë 50 euro, organizon festë, nuk vazhdon grevë. Në ditët e javët në vijim do ta marrim vesh se çka është në pyetje. Nuk është në pyetje arsimi, nuk janë në pyetje arsimtarët. Tha do të konsultohem me anëtarësinë dhe doli para juve”, theksoi Kurti në konferencë për medie, një orë pas takimit me Këshillin Grevist.
Në mëngjesin e së martës, Kurti i kishte pritur në takim përfaqësuesit e Këshillit Grevist të BSPK-së, me në krye Rrahman Jasharajn, me qëllim të gjetjes së një zgjidhjeje për ndërprerjen e grevës në arsim e cila ka filluar qe dy javë.
Këta të fundit u shprehën pas takimit se Qeveria mbeti në pozicionin e saj për ndarje të 50 eurove, kurse sipas Jasharajt, BSPK ishte e gatshme të lëshoj pak pe në të mirë të fillimit të mësimit.
Kërkesa e mësimdhënësve është ndarja e 100 eurove shtesë pagës mujore deri në hyrjen në fuqi të ligjit të pagave, i cili ndodhet në diskutim publik.
