Në një prononcim për media pas takimit, Kurti u shpreh se nga ky takim ka shpresë për një komunikim të ndërsjelltë mes Qeverisë dhe opozitës.
“Është gatishmëri dhe interes i mi që sa më shumë t’i njoftojë edhe partitë politike që s’janë në Qeveri që të kuptojnë se Qeveria jonë është edhe e përgjegjshme në dialog dhe llogaridhënëse. Në Kuvendin e Kosovës e dini që kemi pauzë, kemi pushim deri kah mesi i shtatorit andaj edhe kjo është arsyeja pse e konsideruam se është e një rëndësie të veçantë takimi i tillë në fund të gushtit kur është arritur dakordimi që as në anën e Kosovës të mos ketë aso dokumentet hyrje-dalje… I diskutuam edhe dialogut dhe besoj që është bashkëpunim i shtuar që jep shpresë për edhe më shumë komunikim të ndërjselltë mes mazhorancës dhe Qeverisë dhe opozitës”, tha ai.
Tutje, kryeministri theksoi se pavarësisht marrëveshjes së arritur për dokumente në hyrje-dalje të dy vendeve, mbeten të përkushuar për arritjen e një marrëveshje finale që në qendër ka njohjen reciproke.
“Pavarësisht kësaj edhe marrëveshjes për ata që janë zhdukur edhe për çështjen e energjisë në veri ne ngelim të përkushtuar për kornizën e përgjithshme të marrëveshjes ligjërisht të obligueshme, marrëveshje që sjellë normalizim të plotë sepse e ka në qendër njohjen reciproke”, shtoi ai.
Kurse, sa i përket deklaratave të liderëve opozitarë se janë informuar më shumë nga ndërkombëtarët se nga Kurti për dialogun, ky i fundit tha se nëse ndërkombëtarët kanë thënë diçka më shumë atëherë është mirë të tregojnë dy krerët e partive opozitare.
Po ashtu, Kurti tha se fushata për konvertimin e targave të serbëve të Kosovës zgjat deri më 31 tetor teksa ka ftuar të gjithë ata që këtë ta bëjnë sa më parë.
“Unë besoj që informacion që është i rëndësishëm nuk ka që është mbajtur prej nesh dhe se krejt çfarë është relevante është ndarë me ta, nëse kanë pasur tjetër mbase do të duhej të tregojnë se cili është. Sa i përket çështjeve kryesore nuk janë absolutisht të painformuar. Sa i përket 1 shtatorit vazhdon fushata për konvertimin e targave nga ato që i ka lënë regjimi i Millosheviçit e Serbia tek ato që janë legale të Kosovës. Dhe kjo do të vazhdojë deri më 31 tetor edhe njëherë të gjithë qytetarëve serbë ne i inkurajojmë që ta shfrytëzojnë iniciativën tonë që konvertimi i targave bëhet pa pasur nevojë të paguhet TVSH, akciza e dogana”, tha ai./teve1.info/
