Kryeministri në detyrë Albin Kurti, ka komentuar zotimin e presidentit amerikan, Donald Trump për t’u riangazhuar në dialogun Kosovë-Serbi dhe për të shtyrë përpara procesin e normalizimit.
Kurti ka thënë se beson në mundësinë e normalizimit të marrëdhënieve mes Kosovës dhe Serbisë, por sipas tij trysnia për këtë duhet të jetë mbi Beogradin.
Ai ka theksuar se në këtë drejtim, roli i Shteteve të Bashkuara të Amerikës, si aleati kryesor i Kosovës është gjithmonë i mirëpritur.
“Unë besoj që normalizimi është i mundur, trysnia duhet të jetë mbi Beogradin, dhe gjithmonë e mirëpresim rolin e SHBA të cilët paraqesin aleatin tonë kryesor, partnerin e pazëvendësueshëm dhe mikun special në tri fusha kryesore: e para mbrojtja, e dyta është diplomacia dhe e treta është zhvillimi”, ka thënë Kurti të hënën në një prononcim për media.
Sipas Kurtit, Serbia është duke shkelur marrëveshjen bazike dhe se hapi i parë duhet të jetë dorëzimi i Milan Rajdojçiqit.
“Ne kemi një marrëveshje bazike me Serbinë, e cila po shkelet nga Serbia dhe natyrisht që për të normalizuar marrëdhëniet mes dy vendeve tona është e domosdoshme që ata pikë së pari t’ua dorëzojnë autoriteteve të shtetit tonë, Milan Radojçiqin, kryekriminelin që na vrau rreshterin policor, heroin e Kosovës, Afrim Bunjaku. Më pastaj të pranojnë të nënshkruajnë marrëveshjen bazike me aneksin e zbatimit dhe njëkohësisht ta tërheqin letrën nga dhjetori i vitit 2023, kur ish-kryeministrja Brnabiq pati thënë që nuk respekton integritetin territorial të Kosovës”, ka theksuar ai.
Trump: Do ta zgjidhi sërish çështjen mes Kosovës dhe Serbisë
