Në orën 06:45 të mëngjesit të së mërkurës, u vendos vetura e parë para shtëpisë së kryeministrit, në detyrë, Albin Kurti.
Si kjo, për 15 minutat e ardhshme erdhën edhe dy të tjera në Lagjen Taslixhe në kryeqytet.
Ekipin e mbrojtjes së afërt nuk i la të priste i pari i ekzekutivit.
Por gatishmëri të njëjtë veprimi nuk pati kur u pyet nga Tëvë1 për formimin e qeverisë.
Ky refuzim, nuk ishte i fundit për të mërkurën.
Pasi njësoj, kryeministri veproi edhe në Koshare të Gjakovës.
As këtu, nuk foli para gazetarëve se a do të ftoj në takim Partinë Demokratike dhe Aleancën për Ardhmërinë e Kosovës pasi LDK ia refuzoi ftesën për takim konsultativ.
I heshtur shefi i qeverisë ishte edhe në Kaçanik.
Në tri vende të kësaj komune, pati tentativa për të marrë një qëndrim prej kryeministrit se si do ia bëj për formimin e qeverisë.
Por, në asnjërin rast nuk foli.
Porse, ajo që mori vëmendje ishte prezenca e Kosovare Murselit, deputetes së Partisë Demokratike të Kosovës pranë Kurtit gjatë homazhe për dëshmorët e Kaçanikut.
Televizioni tentoi të marrë një qëndrim nga deputetja në fjalë por kjo qe e pamundur gjatë ditës.
Ndërsa, profesori universitar Dorajet Imeri thotë se arritja e numrave për formimin e Qeverisë do të jetë e vështirë.
Të martën, kryeparlamentari Glauk Konjufca tha se Vetëvendosje e ka të pamundur formimin e qeverisë pa një koalicion pasi nuk i ka votat e nevojshme.
Ftesë për takim konsultativ, subjekti i Albin Kurtit i bëri të hënën kryetarit të Lidhjes Demokratike të Kosovës, Lumir Abdixhikut, mirëpo i njëjti e refuzoi.
