Edhe një muaj, qytetarët serb do iu drejtohen kutive të votimit për zgjedhje parlamentare dhe lokale në Serbi.
E dhe këtë herë Serbia ka kërkuar që ky proces të organizohet edhe në Kosovë për serbët që jetojnë këtu.
Misioni i OSBE’së në Kosovë, ka thënë se më 3 nëntor kanë pranuar një kërkesë nga Qeveria e Serbisë që ta kryejë mbledhjen e votave të votuesve që jetojnë në Kosovë.
E OSBE e ka informuar Qeverinë e Kosovës dhe mekanizmat e tjerë të rëndësishëm për këtë kërkesë, duke shtuar se mbështetja e institucioneve të Kosovës është thelbësore për OSBE-në që të përfshihet në një organizim të tillë zgjedhor.
Mirëpo, për këtë këkresë, i pari i Qeverisë, Albin Kurti të dielen e ka kthyer përgjigjen.
Në letrën që ia ka drejtuar shefit të Misionit të OSBE-së në Kosovë, Michale Davenport, e që e ka siguruar Tëvë1, Kurti thotë se ska zgjedhje në Kosovë, pa një marrëveshje.
“Sa i përket çështjes së bashkëpunimit ndërshtetëror për votimet jashtë vendit, në mënyrë që të mundësohet votimi i qytetarëve të komunitetit serb në Kosovë, me shtetësi të dyfishtë, në zgjedhjet serbe jashtë Zyrës Ndërlidhëse të Serbisë në Kosovë, duhet të arrihet një marrëveshje e posaçme midis Kosovës dhe Serbisë. Kërkesa për një marrëveshje të tillë duhet të vijë nga Serbia, si palë e interesuar. Dhe çdo kërkesë duhet të marrë për bazë sovranitetin dhe pavarësinë e Kosovës, si shtete të barabarta, në pajtim me nenin 2 të Marrëveshjes Bazë të arritur këtë vit mes Kosovës dhe Serbisë”, thuhet në letrën e Kurtit.
Qeveria e Kosovës, ka inkurajuar Serbinë që në bazë të këtyre kushteve të negociojë marrëveshjen për këto zgjedhje.
“Me këto kushte, ne inkurajojmë Serbinë që të negociojë një marrëveshje të tillë speciale me Republikën e Kosovës, duke zbatuar në këtë mënyrë edhe një detyrim tjetër të Marrëveshjes Themelore: të kontribuojë në marrëdhëniet e fqinjësisë së mirë, në bazë të të drejtave të barabarta dhe respektimit reciprok të të drejtat e votuesve jashtë vendit”.
Kurti iu referua Marrëveshjes drejt normalizimit të raporteve të arritur në shkurt në Bruksel. Më pas, Kosova dhe Serbia një muaj më vonë u pajtuan edhe për Aneksin e zbatimit të saj.
Në nenin dy të kësaj marrëveshjeje thuhet se Të dyja palët do të udhëzohen nga qëllimi dhe parimet e përcaktuara në Kartën e Kombeve të Bashkuara, veçanërisht ato që kanë të bëjnë me të drejtat sovrane të shteteve, respektimin e pavarësisë, autonomisë dhe integritetit territorial të tyre, të drejtën për vetëvendosje, mbrojtjen e të drejtave të njeriut dhe mosdiskriminimin”.
Qeveria e Kosovës në vitin 2022, kishte ndaluar mbajtjen e zgjedhjeve të Serbisë në Kosovë. Si rezultat, serbët e Kosovës janë organizuar dhe me autobusë kanë udhëtuar drejt Serbisë, për të votuar.
