Kryeministri në detyrë i Kosovës, Albin Kurti ka thënë se përfundimi i luftë dhe çlirimi i vendit shënon fundin një periudhe të errët në historinë e popullit të Kosovës dhe hapi një kapitull të ri që kulmoi me shpalljen e pavarësisë.
Ai ka thënë se 26 vjet pas çlirimit dhe 17 vjet pas shpalljes së pavarësisë, Kosova është vendi më demokratik në Ballkanin Perëndimor.
“Çlirimi i Kosovës shënoi përfundimin e një periudhe të errët në historinë e popullit tonë dhe hapjen e një kapitulli të ri, i cili kulmoi në Republikën e pavarur dhe sovrane që e kemi sot. Vetëm 26 vjet pas çlirimit dhe 17 vjet pas shpalljes së pavarësisë, Kosova, prej rrënojave të luftës dhe gjenocidit, ka arritur të bëhet vendi më demokratik i Ballkanit Perëndimor me arritje të lartë ekonomike. Nga Ushtria Çlirimtare e Kosovës, te Trupat Mbrojtëse të Kosovës, dhe tash Forca e Sigurisë së Kosovës, këto janë tri faza të më shumë se çerekshekulli të së njëjtës kahje dhe drejtim, perëndimor e demokratik, të paqes dhe të sigurisë”, ka shkruar Kurti në Facebook.
Ai ka thënë se në shënimin e Ditës së Çlirimit të Kosovës duhet falënderuar gjithë ata që kontribuan për këtë ditë ku siç ka thënë më e rëndësishmja ishte edhe intervenimi i NATO-s
“Me kalimin e dekadave, shënimi i kësaj dite, dhe përkujtimi i dëshmorëve dhe i viktimave, po bëhen më shumë të rëndësishme, sepse çdo vit e më tepër po shtohen përpjekjet nga Serbia dhe Rusia për të rishkruar historinë: në njërën anë për të vënë në dyshim drejtësinë dhe justifikimin e intervenimit të NATO-s, dhe në anën tjetër për të keqpërdorur atë si precedent për agresionin e paprovokuar ndaj Ukrainës. Këto përpjekje për të deformuar historinë, duhet t’i luftojmë dhe kundërshtojmë me çdo kusht, me faktet e pamohueshme të asaj kohe. Për dallim të madh nga lufta ilegale e Rusisë, intervenimi ushtarak i NATO-s ishte edhe i drejtë, edhe i domosdoshëm”, ka shkruar Kurti.
