Kryeministri i Kosovës, Albin Kurti, ka bërë homazhe në kompleksin e varrezave të dëshmorëve dhe martirëve në fshatin Marec të Komunës së Prishtinës, në 24-vjetorin e rënies së 27 dëshmorëve dhe vrasjes së 16 martirëve.
Kurti ka thënë se bëhet fjalë për një betejë të Ushtrisë Çlirimtare të Kosovës, e cila ia futi tmerrin forcave armike serbe, që sipas tij, më pas në fshatin Makoc e shfrynë mllefin e tyre nga humbja e betejës mbi civilët e pafajshëm e të pambrojtur.
“Ai tha se si institucione të Republikës, si politikanë përfaqësues, si qytetarë të këtij vendi u jemi përjetë mirënjohës e falënderues, por gjithashtu shprehim zotimin tonë edhe për kujtime e përkujtime institucionale, por gjithashtu edhe për angazhimin për drejtësi për viktimat e për ndëshkim për kriminelët”, thuhet në njoftimin e Zyrës së Kryeministrit.
Gjithashtu, kryeministri nga Mareci ka bërë homazhe edhe në Makoc, ku mes datave 19 dhe 23 prill u vranë gjithsej 115 civilë, fëmijë e pleq. Për këtë masakër Kurti ka thënë se është një dëshmi e radhës së gjenocidit të Serbisë, që sipas tij, u mundua ta shfarosë popullin shqiptarë nga trojet e veta.
Bashkë me kryeministrin Kurti në homazhe ishin edhe ministri i Shëndetësisë, njëherësh kryetar i qendrës së Lëvizjes Vetëvendosje në Prishtinë, Arben Vitia, zëvendësministri i Mbrojtjes, Shemsi Syla, asamblistë të Lëvizjes Vetëvendosje në Kuvendin Komunal të Prishtinës dhe aktivistë të tjerë.
