Kryeministri Albin Kurti ka bërë të ditur se nëse dëmi i shkaktuar nga shpërthimi në kanalin e Ibër-Lepencit nuk riparohet atëherë një pjesë e Kosovës rrezikon të mbetet pa energji elektrike që në mëngjes.
Ndërkohë, tha se disa qytete dhe një pjesë e Prishtinës rrezikojnë të mbeten edhe pa ujë të pijshëm.
“Sulmi është kryer nga profesionistë, është sulmi i radhës kriminal e terrorist që ne besojmë e vjen nga bandat të dirigjuara e të orkestruara nga Serbia, e cila e ka edhe interesin edhe gatishmërinë edhe aftësinë për të shkaktuar sulme e dëmtime të këtilla, në rastin konkret duke përdorur një sasi të madhe eksplozive në një nyje kyçe, ku riparimi është i vështirë. Nëse dëmi nuk riparohet atëherë një pjesë e Kosovës rrezikon të mbetet pa energji elektrike që në mëngjes. Disa qytete dhe një pjesë e Prishtinës rrezikojnë të mbetet pa ujë të pijshëm”, deklaroi Kurti në konferencë për media./teve1.info/
