Kryeministri i Kosovës, Albin Kurti, ka thënë se janë krenar dhe ballëhapur në shënimin e trevjetorit të qeverisjes, derisa ka numëruar disa nga “sukseset” e tyre.
Përmes një konference për media, kryeministri ka thënë se gjatë kësaj periudhe, e arritura kryesore është se Kosova është ngritur në ekonomi me rritje prej 6.2% bruto-produktit vendo, derisa kjo rritje është shpërndarë përmes pakove të ndryshme.
“Punësimi është më i lartë se ç’ka qenë ndonjëherë. Në këto 3 vite qeverisje kemi shënuar rezultate për të cilat jemi krenarë dhe ballëhapur”, potencoi Kurti.
Përveç të tjerash, Kurti ka folur edhe për sistemin e drejtësisë në Kosovë.
“Sistemi i drejtësisë, nevoja për prokurorë aktiv dhe energjik, dhe për gjyqtarë, gjykatës të cilët janë të drejtë është pika ku më së shumti çalon shtet-ndërtimi demokratik në Kosovë”, ka theksuar ai.
Më tej, Kurti tha se përgjatë këtyre viteve qeverisje, në veri është ulur ilegaliteti, njëkohësisht është rritur ligjshmëria.
Me ç’rast, ka përmendur shtrimin e rrugëve, ndërtimin e shtëpive për banorët atje, e madje edhe modernizimin e infrastrukturës e telekomunikimit.
“Në veri është ulur ilegaliteti e po rritet ligjshmëria, janë mbyllur rrugë ilegale, laboratorë droge e të kriptovalutave. Në vend të tyre janë hapur e funksionalizuar zyrat e agjencisë së regjistrimit të bizneseve të Kosovës dhe të kadastrave komunale në shërbim të qytetarëve dhe të bizneseve. Me largimin e targave ilegale, siguria publike është më e mirë. Atje tani po shtrohen rrugë, po ndërtohen shtëpi të banorëve, e po modernizohet infrastruktura e telekomunikimit e internetit dhe 4g plus dhe 5 g”, deklaroi tutje Kurti.
E sa i përket punësimit në Kosovë, kryeministri tha se falë mbështetjes së masave të ndërmarra nga Qeveria, mbi 30 mijë gra janë punësuar.
“Po i mbushim tre vjet qeverisje dhe kemi shënuar rezultate. Punësimi është më i lartë seç ka qenë ndonjëherë, kemi dyfish më shumë të rinj të punësuar në treg të punës, mbi 30 mijë gra më shumë kanë vende pune përmes masave dhe mbështetjes sonë direkte”, shtoi tutje Kurti.
Kryeministri dje u shpreh i kënaqur në atë se çka ka arritur si qeveri së bashku me ekipin e tij të ministrave, grupin parlamentar, me institucionet dhe agjencitë shtetërore të cilat, siç ka thënë ai kanë pasur bashkëpunim të mirë me qeverinë në këtë progres socio-ekonomik dhe demokratik./teve1.info/.
