Kryeministri i vendit, Albin Kurti, ka pritur në takim zëvendës Ndihmës Sekretarin e Shteteve të Bashkuara për Çështje Evropiane dhe Euroaziatike, të dërguarin e posaçëm të ShBA-së për Ballkanin Perëndimor, Gabriel Escobar dhe ambasadorin e ShBA-së, Jeffery Hovenier.
Përmes një komunikate për media, thuhet se Kurti ka theksuar që sulmi ndaj nënkryetares së Zveçanit, Natasha Tomaniq, duhet dënuar.
Njëherit, kryeministri ka thënë se sulmi është vazhdimësi e kërcënimeve të Serbisë ndaj sigurisë së Kosovës pas sulmit terrorist në Banjskë, për të cilët tha se kryesit e sulmit janë ende të lirë dhe të mbrojtur në shtetin serb.
“Duke kujtuar takimin e fundit që kishin së bashku nga tetori i vitit të kaluar, kryeministri e falënderoi z. Escobar për vizitën dhe foli për zhvillimet që kanë shënuar këta pesë muaj. Kryeministri tha se sulmi ndaj nënkryetares së Zveçanit, Natasha Tomaniq, duhet dënuar. Sulmi është vazhdimësi e kërcënimeve të Serbisë ndaj sigurisë së Kosovës pas sulmit terrorist dhe paramilitar të 24 shtatorit në Banjskë ku mbet i vrarë rreshteri i Policisë së Kosovës, Afrim Bunjaku, ndërkohë që kryesit e këtij sulmi ende janë të lirë dhe të mbrojtur në Serbi”, thuhet në komunikatë.
Ndërkaq, sa i përket vendimit të Bankës Qendrore për ndalimin e dinarit serb, Kurti ka potencuar se Qeveria ka bërë veprime për të siguruar që tranzicioni të jetë i shpejtë dhe i lehtë për qytetarët e Kosovës nga komuniteti serb.
“Në lidhje me rregulloren e Bankës Qendrore, Kryeministri pati diskutim përmbajtjësor të fokusuar në adresimin e shqetësimeve të përbashkëta. Ai tha se vendimi i Bankës Qendrore është vendim i një institucioni të pavarur dhe profesional. Për shkak të ndikimit të rregullores në komunitetin serb të Kosovës, qeveria ka bërë veprime për të siguruar që tranzicioni të jetë i shpejtë dhe i lehtë për qytetarët e Kosovës nga komuniteti serb”, ka deklaruar Kurti.
Po ashtu, kryeministri ka falënderuar Escobar për rolin dhe kontributin e tij dhe të ShBA-së, teksa ka shtuar se sukseset e Kosovës janë të përbashkëta me ta./teve1.info/.
