Prezenca e tyre këtu nuk është e zakonshme.
Ata i paraprinë ardhjes së kryeministrit në detyrë, Albin Kurti.
Si palë e dëmtuar, mëngjesin e sotëm Kurti u paraqit në Gjykatën Themelore në Prishtinë.
Në seancën fillestare, prokurori special lexoi aktakuzën ku jepen detaje se si dy të akuzuarit, Faton Klinaku e Nuredin Selmani, përmes postimeve në facebook, kanosën Kurtin.
Me cilësimin e përmbajtjes si kanosës nuk u pajtua Klinaku, e as Nuredin Selmani.
E Kurti, refuzoi të paraqesë kërkesë pasurore juridike ndaj të akuzuarve.
Edhe pas seancës, dyshja Klinaku e Selmani nuk u zmbrapsën nga mesazhet e tyre që u bën shkas që ndaj tyre të ngritej aktakuza.
Faton Klinaku, në gusht të vitit 2023 kishte përsëritur këtë postim me përmbajtje kërcënuese ndaj Kurtit.
“Prapë po e përsëris, nëse ju duket skandaloz postimi i mëhershëm: Më parë e vras Albin Kurtin sesa t’ia lëshoj rrugën dhe të iki nga Kosova”, ishte shprehur ai.
Ndërkaq, Nuredin Selmani sipas Prokurorisë, e ka kanosur me vrasje Kurtin përmes postimeve të bëra në Facebook, duke iu referuar postimit kërcënues të Klinakut.
Në një afat 30 ditor pas seancës së sotme, të dy kanë kohë që ta kundërshtojnë aktakuzën.
