Kryeministri në detyrë, Albin Kurti të dielën ka nderuar me homazhe veprimtarin dhe humanistin, Xhevdet Leci, në 26-vjetorin e rënies heroike të tij.
Sipas Zyrës së Kryeministrit, në këtë përvjetor, Kurti ka vlerësuar figurën dhe kontributin e Lecit, veçanërisht gjatë viteve ‘99, kur punoi për mbrojtjen e të drejtave të shqiptarëve.
“Xhevdet Leci gjatë viteve të ‘90-ta punoi ditë-natë për mbrojtjen e të drejtave të shqiptarëve, për mbrojtjen e të drejtave të njeriut, ishte edhe patriot, edhe humanist dhe në të njëjtën kohë zgjeronte, thellonte, ngriste rezistencën e popullit tonë, e cila fillimisht ishte paqësore e paarmatosur, e më pastaj edhe kryengritje e armatosur çlirimtare e udhëhequr nga UÇK-ja”, ka thënë ai.
Kryeministri në detyrë thuhet se po ashtu ka theksuar se nëpërmjet figurave më të ndritshme të historisë së Kosovës, siç është Xhevdet Leci, të rinjtë duhet të mësojnë dhe të ndjekin rrugën e tyre, në mënyrë që historia të bëhet pjesë e vetëdijes kolektive.
Xhevdet Leci, veprimtar i çështjes kombëtare, ra heroikisht më 18 maj 1999 në mbrojtjen e popullatës së zhvendosur në Barilevë, duke u përballur me policinë serbe./teve1.info/
