Dy herë, kryeministrit Albin Kurti i shkoi ftesë nga Prokuroria Speciale për të dëshmuar në rastin e rezervave shtetërore.
Të dy ftesat u refuzuan nga Kurti, i cili më pas publikisht prokurorët i ftoi në kryeministri, duke mohuar gatishmërinë për të dëshmuar në ambientet e prokurorisë.
E ky organ hetues, ka marrë rrugë tjetër për të siguruar dëshminë e Kurtit.
Prokuroria Speciale, përmes një kërkese i është drejtuar Gjykatës Themelore në Prishtinë, që ta urdhërojë Kurtin për të dhënë dëshmi.
“Konfirmojmë se Gjykata Themelore në Prishtinë – Departamenti Special ka pranuar kërkesën në fjalë nga Prokuroria Speciale e Republikës së Kosovës, e njëjta është duke u shqyrtuar nga gjykata”, ka deklaruar zëdhënësja e Gjykatës, Mirlinda Gashi.
Ky veprim konsiderohet si brenda asaj që është e përcaktuar me ligj.
Nëse edhe me këtë rast, Kurti refuzon së dhëni dëshmi, për të parashihen pasoja tjera.
“Jemi brenda asaj që ka përcaktur ligji, procedurës ligjore. Prokuroria Speciale e Republikës së Kosovës, e ka kryer obligimin e vet kur e ka ftuar Kurtin për të dëshmuar dhe që ligjërisht në rast se refuzon, atëherë kërkon nga ana e Gjykatës që ta obligojë të njëjtin që të dëshmojë. Në këtë rast fillimisht Gjykata mundet që ta urdhëroj kryeministrin Kurti që të jep dëshminë e tij, dhe nëse këtë nuk e bën atëherë mund të shqiptoj gjobë deri në 250 euro”, ka deklaruar Gzim Shala nga IKD.
Sipas ligji, dënimi me gjobë mund të përsëritet disa herë, duke pasuar pastaj edhe me paraburgosje.
“Deri në momentin kur Gjykata bindet se përkundër shqiptimit të gjobave, i njëjti do të refuzojë që të dëshmojë. Dhe vetëm në këtë situatë, hapet mundësia që të burgoset deri në një periudhë deri sa të dëshmojë, deri sa dëshmia e tij është jorelevante, mirëpo jo më shumë se një muaj”, ka thënë ai për Tëvë1.
Për rastin e rezervave shtetërore, muaj më parë dëshmoi ministrja e Industrisë, Tregtisë e Ndërmarrësisë, Rozeta Hajdari.
