Në ditën e dytë të qëndrimit në Bruksel, kryeministri në detyrë i Kosovës, ishte i ftuar si folës në Konferencën e organizuar nga Fondacioni për Studime Progresive Evropiane (FEPS), me temë “Një kapitull i ri i përbashkët për zgjerimin e Bashkimit Evropian”.
Gjatë adresimit të tij ai tha se mbajtja në sirtar të aplikimit të Kosovës për anëtarësim në Bashkimin Evropian për më shumë se 27 muaj, përkundër angazhimit dhe reformave të realizuara, nuk pasqyron qasje të bazuar në meritë, dhe se një situatë e këtillë rrezikon besimin ndaj procesit.
Me tej, shtoi se te Komisioni i ri Evropian ka vërejtur më shumë gatishmëri, vullnet dhe interes për të përfshirë Ballkanin Perëndimor në Bashkimin Evropian, “megjithëse duket të ketë më shumë gatishmëri dhe interes sesa vullnet, teksa theksoi rëndësinë që të rritet vullneti, sepse gatishmëria dhe interesi nuk mjaftojnë pa vullnetin”.
Zyra e Kryeministrit njoftoi se Kurti bëri thirrje për më shumë aktivizim, bashkëpunim dhe solidaritet ndërmjet partive simotra dhe socialdemokratëve dhe njëkohësisht më shumë optimizëm të përgjegjshëm dhe entuziazëm ndaj qytetarëve.
Kjo konferencë u organizua në kuadër të programit “Willy Brandt për Zgjerimin e Bashkimit Evropian” të Grupit të Aleancës Progresive të Socialistëve dhe Demokratëve (S&D) në Parlamentin Evropian./teve1.info/
