Kryeministri i Kosovës, Albin Kurit, gjatë seancës së sotme në Kuvendin e Kosovës ka diskutuar edhe për sulmin terrorist të 24 shtatorit, që ka ndodhur në Bansjkë të Zveçanit.
Ky diskutim erdhi pas deklaratave të deputetit të Partisë Demokratike të Kosovës, Ferat Shala, i cili e pyeti Kurtin për deklaratat e bëra, ku kishte thënë se terroristët i kanë vetëm dy opsione meqë janë të rrethuar dhe ose duhet të dorëzohen ose do të asgjësohen.
Lidhur me këtë, Kurti përmendi marrëveshjen e ish-presidentit, Hashim Thaçi, që nënshkroi në vitin 2013 që ushtria e vendit nuk kalon përtej lumit Ibër.
Kurti këtë marrëveshje e cilësoi katastrofale, duke thënë se për shkak të saj, është i kushtëzuar në raportet me NATO-n.
“Kufirin e kemi shumë të gjatë me Serbinë, 381 kilometër, më i gjati është në Podujevë, mandej në Leposaviq. Në Leposaviq kufirin do të duhej, po edhe në Zubin Potok dhe në Zveçan me na ruajtur ushtria. Mirëpo me datë 19 prill 2013, ish-kryeministri Thaçi ia ka çu një letër ish-sekretarit të përgjithshëm të NATO-s që FSK-ja se kalon Ibrin. Katastrofë është ajo letër. Unë jam i kushtëzuar në raportet me NATO-n për shkak të qasaj letre. Prandaj, para se me u kualifiku me na bë këtë kritikë e me kqyr me na marrë në pyetje trego a është gabim apo është në rregull qajo letër. Sepse, kufirin nuk ta ruan, e nuk ta mbron policia si ushtria”, tha kryeministri Kurti.
Tutje, ai tha se po të mos ishte ajo letër e 2013-tës, Forca e Sigurisë së Kosovës do të ishte në veri, dhe ajo do ta ruante kufirin, jo Policia e Kosovës.
“Mos të ishte ajo letër, ne e kishim pas Forcën e Sigurisë së Kosovës në veri të Kosovës, nuk e kemi. Po na duhet me këto vegla e mjete pune që i kemi ta bëjmë maksimumin”.
Gjithashtu, Kurti diskutoi edhe njëherë për marrëveshjen e Brukselit duke thënë se nga pikëpamja e Bashkimit Evropian ka marrëveshje.
“Thelbi i linjës opozitare të kundërshtimit tim sot a din cili është? Edhe ti je bë si na. Në mënyrë që edhe ju me qenë në paqe me mëkatin e juaj. Kjo është thelbi i krejt kësaj. Por, nuk është ashtu. As s’jam bë, as nuk bëhem kurrë si ju. Por, le t’i marrin çështjet me radhë që i trajtuam këtu marrëveshja bazike me aneksin zbatues, unë e kam konsideruar marrëveshje të mirë, jo të shkëlqyeshme, marrëveshje të mirë. Por, është ndërmjetësi që pa nënshkrim e ka shpallur në rregull në bazë të traktatit të Vjenës edhe ka thënë që e mbani në mend Borrellin, we have a deal. Nga pikëpamja e Bashkimit Evropian kemi marrëveshje. Unë kam insistuar gjithnjë për nënshkrim, sepse në shtator të vitit të kaluar kështu ka qenë nisma. Më tej, unë nuk kam faj që s’kam koalicion, populli ka vendosur kështu me 14 shkurt 2021”, shtoi Kurti./teve1.info/
