Kryeministri i Kosovës, Albin Kurti e ka mirëpritur në një takim Elhame Muqollin, e mbijetuara e masakrës së Paklekut, Teuta Elshanin, familjare e të rënëve, Afrim Hysenaj, autori i monografisë për masakrën e Paklekut dhe Fadil Muqolli, familjar dhe pronar i shtëpisë Muze.
Sipas komunikatës së Qeverisë, gjatë bisedës e mbijetuara e masakrës Elhame Muqolli ka ndarë përjetimet e saj gjatë luftës dhe masakrës së Paklekut, teksa ajo ka shpreh pakënaqësinë e saj me mungesën e drejtësisë për këto krime tash e 25 vjet.
Derisa, Kurti e falënderoi atë dhe mysafirët e tjerë për vizitën, qëndresën, sakrificën e kurajën e tyre, dhe theksoi rëndësinë e dëshmimit dhe dokumentimit të krimeve, “duke i qëndruar besnik historisë sonë dhe duke insistuar në të drejtën tonë që të gjithë kriminelët, qofshin ata urdhërdhënës qofshin ekzekutues, të përfundojnë prapa grilave në drejtësinë vendore ose asaj ndërkombëtare”.
Sipas njoftimit të Qeverisë, ata u shprehën mirënjohës për mirëpritjen dhe për mbështetjen institucionale për realizimin e monografisë dhe në muzealizimin e shtëpisë ku është kryer masakra.
”Kryeministri pranoi nga autori Afrim Hysenaj dy librat e tij, monografinë për masakrën e Paklekut me titull “Shtëpia me gjak në mure”, që do të promovohet nesër në shtëpinë muze në Paklek, dhe monografinë për masakrën e familjes Delijaj në Abri të Epërme, e titulluar “Toka skuq e qielli nxin”, thuhet në komunikatë.
Ndryshe, në masakrën e Paklekut, me 17 prill 1999, u masakruan 53 civilë shqiptarë, në mesin e tyre pesë foshnje, më e vogla ishte 6 muajsh. Pas ekzekutimit, forcat serbe u kthyen dhe i dogjën kufomat dy herë./teve1.info/
