Kryeministri i Kosovës, Albin Kurti, i shoqëruar nga ministrja e Ekonomisë, Artane Rizvanolli, ka marrë pjesë në përurimin e pikës më të re të Postës së Kosovës në sheshin “Zahir Pajaziti”, në kryeqytet.
Me këtë rast, Kurti shfrytëzoi mundësinë që ta dërgonte një kartolinë me bukuritë dhe pasuritë natyrore të vendit të Kosovës, nëpërmjet shërbimit postar të Postës së Kosovës.
“Ai e falënderoi Kryeshefen ekzekutive të Postës, Nora Rracin edhe ministren e Ekonomisë, Artane Rizvanolli për punën që po e bëjnë në Postën e Kosovës, e cila së fundmi ka një flotë prej 56 motoçikletave elektrike dhe shtatë furgonëve të rinj me të cilët është më pranë qytetarëve në ofrimin e shërbimeve postare”, thuhet në komunikatën e Zyrës së Kryeministrit.
Kryeshefja e Postës së Kosovës, Nora Rraci, falënderoi Qeverinë e Kosovës për përkrahjen e e vazhdueshme ndaj Postës së Kosovës në arritjen e misionit të tyre drejt një shërbimi sa më të mirë ndaj qytetarëve të Kosovës.
Ndërkaq, Rizvanolli, tha se në secilën nga vizitat, si në Postë, por edhe ndërmarrje të tjera, me këto ndryshime, ka edhe motivim më të madh të punonjësve, duke e ditur se postierët deri vitin e kaluar nuk kanë pasur as çanta as pajisje digjitale.
Pika e përuruar sot është pika 145-të e Postës së Kosovës në tërë territorin e Republikës së Kosovës./teve1.info/
