Kryeministri i Kosovës, Albin Kurti, ka thënë se medalja e artë e fituar nga boksierja Donjeta Sadiku në turneun ndërkombëtar të boksit “Strandja” në Bullgari ka rëndësi të veçantë për Kosovën pasi ajo është fituar pas 48 vitesh, shkruan KosovaPress.
Kurti ka shtuar se në këtë turne Sadiku tregoi formë të lartë duke shënuar tri fitore radhazi dhe duke ndjekur kështu gjurmët e legjendës së boksit kosovar Mehmet Bogujevci.
“Donjeta Sadiku ka shkëlqyer në turneun ndërkombëtar të boksit “Strandja 2025” në Sofje, duke fituar medaljen e artë kundër boksieres nga Kazakistani me rezultat bindës 5:0.
Kjo medalje ka rëndësi të veçantë, ku pas 48 vitesh, Donjeta bëhet boksierja e parë nga Kosova që e fiton të artën në këtë turne, duke ndjekur gjurmët e legjendës Mehmet Bogujevci, i cili e fitoi të artën në vitin 1977.” Tha kryeministri Kurti ndër të tjera.
Në këtë garë, medalje të bronzta fituan Loris Idrizi dhe Bashkim Bajoku, ndërsa referi ndërkombëtar Latif Demolli ndau drejtësinë në turne.
