Kryeministri i Kosovës, Albin Kurti, është deklaruar pas takimit që pati me nënsekretaren amerikane të shtetit, Elizabeth Allen.
Kurti thotë se në takim me Allen kanë diskutuar për zhvillimet e fundit në vend.
Në komunikatë është bërë e ditur se Kurti ka falënderuar Allen për mbështetjen e vazhdueshme të ShBA-së ndaj Kosovës.
“Për këtë të fundit, ai falënderoi nënsekretaren Allen për mbështetjen e vazhdueshme të Shteteve të Bashkuara përmes USAID-së në përgatitjen dhe përmbylljen e suksesshme të ankandit të parë të energjisë solare dhe programit Kompakt të Korporatës së Sfidave të Mijëvjeçarit (MCC) i cili hyri në fuqi në fund të muajit të kaluar”, thuhet në komunikatë.
Tutje, gjatë takimit Kurti ka përmendur edhe kërcënimet e Serbisë ndaj Kosovës.
“Në takim, kryeministri ngriti brengën e tij mbi kërcënimet e vazhdueshme të Serbisë ndaj Kosovës, edhe për faktin që autori dhe lideri i grupit të terroristëve dhe paramilitarëve që ekzekutuan sulmin e 24 shtatorit 2023 në Banjskë, Millan Radoiçiq, vazhdon të jetë i lirë në Serbi”.
Gjithashtu, është bërë e ditur se çështje për diskutim ka qenë edhe raporti me Serbinë, konkretisht dialogu.
“Për këtë çështje, kryeministri Kurti theksoi rëndësinë e zbatimit të plotë e të pakushtëzuar të Marrëveshjes Bazike dhe aneksit të saj”, thuhet në njoftim.
“Sa i përket rrugëtimit të Kosovës në integrimet evropiane, ai shprehu keqardhjen e tij që Komiteti i Ministrave të Këshillit të Evropës nuk pati gatishmëri që ta përfshijë Kosovën në agjendën e votimit të 17 majit, duke marrë parasysh se Kosova i ka plotësuar të gjitha kriteret e anëtarësimit në këtë organizatë, siç është konfirmuar edhe nga instancat e vetë kësaj organizate, përfshirë Asamblenë Parlamentare, dhe kur dihet që anëtarësimi i ynë do t’i kontribuonte forcimit dhe promovimit të të drejtave të njeriut”
Kurti ka deklaruar mes tjerash se ShBA-ja është aleatja, mikja dhe partnerja historike e Kosovës.
“Shtetet e Bashkuara të Amerikës janë aleatja, mikja dhe partnerja jonë historike, aktuale dhe e së ardhmes, andaj presim që të fuqizojmë dhe thellojmë bashkëpunimin bilateral, veçanërisht në fushën e ekonomisë dhe tregtisë”, theksoi kryeministri./teve1.info/
Pleasure to meet with @StateDept Under Secretary for Public Diplomacy and Public Affairs Liz Allen (@UnderSecPD). I discussed the vast democratic reforms made in our country and the pivotal support of the US and the @MCCgov in aiding this positive transition across sectors. pic.twitter.com/lpUat0PVaH
— Albin Kurti (@albinkurti) May 19, 2024
Ndërkohë, Allen ka shkruar se me kryeministrin Kurti kanë diskutuar për zbatimin e të gjitha marrëveshjeve që janë arritur përmes dialogut.
“Vlerësoj diskutimin gjithëpërfshirës me kryeministrin e Kosovës, Albin Kurti. Kosova bën pjesë në BE dhe në NATO. Ne kërkojmë zbatimin e plotë të të gjitha marrëveshjeve që kanë bërë Kosova dhe Serbia në kuadër të Dialogut të lehtësuar nga BE-ja”, ka shkruar ajo./teve1.info.
