Kryeministri i Kosovës, Albin Kurti ka kujtuar 1 prillin e vitit 1999, kur njësitë policore, ushtarake dhe paraushtarake serbe nisën dëbimin e banorëve shqiptarë të Prishtinës dhe deportimin e tyre në drejtim të Maqedonisë dhe Shqipërisë.
Kurti në Facebook, ka shpërndarë disa fotografi ku mes tjerash tha se fotografia e parë ishte e shkrepur pikërisht atë ditë në stacionin e trenave në Prishtinë, nga fotoreporteri i Reuters, Goran Tomašević, e cila tha se tregon popullsinë shqiptare të dëbuar të Prishtinës duke hipur nëpër trena.
Kryeministri tha se e vërteta e luftës së Kosovës është e dëshmuar nga faktorë vendorë dhe ndërkombëtarë.
Teksa theksoi se Republika e Kosovës dhe populli i saj nuk harron asnjëherë dhe nuk falë askë.
“Republika e Kosovës dhe populli i saj nuk harron asnjëherë dhe nuk falë askë! E vërteta e luftës së Kosovës është e dëshmuar nga faktorë vendorë dhe ndërkombëtarë siç edhe është hulumtuar dhe studiuar brenda dhe jashtë Kosovës. Shteti i Kosovës do të kujdeset që historia dhe trashëgimia e luftës së Kosovës, të studiohet për njohje dhe të adresohet për kujtesën kolektive. Kriminelët e luftës duhet nxjerrur para drejtësisë, ashtu siç Serbia duhet mbajtur përgjegjëse para drejtësisë ndërkombëtare dhe para historisë, për shkaktimin e luftës në Kosovë dhe për të gjitha vrasjet e masakrat, spastrimin etnik dhe veprimet e kryera gjenocidale, shkatërrimet dhe plaçkitjet, si dhe dëmet e të gjitha pasojat e luftës në Kosovë!”, tha ai./teve1.info./