Kurti: Miratimi i buxhetit 2026 lajm i mirë për Republikën dhe qytetarët
Kryeministri i Kosovës, Albin Kurti, e ka cilësuar si lajm tejet të mirë për vendin dhe qytetarët miratimin e Buxhetit për vitin 2026, në vlerë prej rreth 4 miliardë euro.
Ai falënderoi deputetët për votën mbështetëse, por edhe për vërejtjet dhe kritikat e dhëna gjatë debatit parlamentar, duke shtuar se ato mund të trajtohen në kuadër të rishikimit të buxhetit.
Kurti rikujtoi se buxheti ishte dashur të miratohej në fund të vitit të kaluar, por theksoi se votimi i tij u bë i mundur vetëm tani.
Sipas tij, buxheti i miratuar parasheh 867 milionë euro për komunat, përfshin pagën e 13-të për punëtorët e sektorit publik si dhe ndryshimin që mundëson dyfishimin e shtesës për përvojën e punës nga 0.25 për qind në 0.50 për qind për 15 vitet e para të shërbimit.
Ai shkroi se është paraparë shtyrja e afatit për zbatimin e shkallës progresive të tatimit në pronë, deri në miratimin e Ligjit të ri për Tatimin në Pronë, në konsultim me komunat.
Kurti bëri të ditur se me buxhetin e ri rritet mbështetja për barna esenciale, për kulturën dhe sportin, si dhe për ndërmarrësit në sektorin privat, bujqit dhe investimet në infrastrukturë publike.
“Megjithatë, buxheti i miratuar sot, në vlerë prej rreth 4 miliardë euro, parasheh 867 milionë euro për komunat; përfshin pagën e 13-të për punëtorët e sektorit publik; përmban ndryshimin e nevojshëm që mundëson dyfishimin e shtesës për përvojën e punës nga 0.25 për qind në 0.50 për qind për 15 vitet e para; si dhe shtyrjen e afatit për zbatimin e shkallës progresive të tatimit në pronë, derisa të miratojmë Ligjin e ri për Tatimin në Pronë, në konsultim me komunat e vendit tonë”, ka shkruar ai në Facebook. /teve1.info/
