Kryeministri i Kosovës, Albin Kurti, ka kujtuar 24-vjetorin e Masakrës në Qyshk, Zahaq, Llabjan dhe Pavlan, ku tha se forcat e armatosura të Serbisë vranë mbi 120 shqiptarë civil në këto vende.
“Në mëngjesin e hershëm të 14 majit 1999, në mes të fushatës ajrore të NATO-s kundër ish-Jugosllavisë, forcat e armatosura të Serbisë, hynë në fshatin Qyshk. Ishin rreth 100 pjesëtarë të armatosur, me fytyra të mbuluara me ngjyrë të zezë ose maskë, dhe disa prej tyre kishin në kokë shalla të zinj dhe kapele të gjelbra të stilit kauboj. Mes tyre ishte edhe grupi i quajtur “Çakallët”. Ata dëbuan me dhunë banorët nga shtëpitë. I mblodhën në qendër të fshatit, u grabitën paratë dhe stolitë e arit. Ua grisën dhe dogjën dokumentet e identifikimit personal. Pastaj i ndanë burrat nga gratë dhe fëmijët. Burrat i dërguan në tri shtëpi, ku i pushkatuan dhe pastaj i dogjën”, ka shkruar Kurti.
Kryeministri thotë për se disa prej këtyre vrasjeve u iniciua gjykimi në Beograd.
“Në vitin 2010 ishte ngritur aktakuzë për 11 persona. Pasi u dëgjuan 116 dëshmitarë, në shkurt të vitit 2014 me aktgjykim të shkallës së parë, 9 persona u dënuan. Në shkurt të vitit 2015, Gjykata e Apelit në Beograd anuloi aktgjykimin dhe ktheu lëndën në rigjykim. Në tetor të 2022 dështoi vazhdimi i rigjykimit ndaj njësisë paraushtarake serbe “Çakallët” në Beograd. Nuk ka asnjë të dënuar me aktgjykim përfundimtar”, ka thënë i pari i qeverisë.
Mes tjerash, Kurti, ka thënë se sistemi i drejtësisë duhet të angazhohet për drejtësi për viktimat dhe gjykimin e dënim të kriminelëve të luftës dhe urdhërdhënëse të tyre.
Kurti tha se krimet e Serbisë të kryera gjatë luftës në Kosovë nuk mund të falen as harrohen.
“Sistemi ynë i drejtësisë duhet të angazhohet për drejtësi për viktimat dhe gjykim e dënim të kriminelëve të luftës dhe urdhërdhënësve të tyre. Krimet e Serbisë të kryera gjatë luftës në Kosovë nuk mund të falen e as harrohen. Proceset e rralla e të pakta gjyqësore në Serbi ishin tallje me viktimat dhe shpërlarje kriminelësh. Gjaku i të rënëve për liri nuk humbet. Kujtimi për ta është i përjetshëm. Lavdi!”, ka shkruar Kurti. /teve1.info/
