Kryeministri i Kosovës, Albin Kurti, ka bërë të ditur se Kosova e ka fituar të drejtën e organizimit të Olimpiadës së 14-të Matematike Evropiane për Vajza për vitin 2025.
Kurti tha se kjo olimpiadë është gara më prestigjioze ndërkombëtare matematike për vajza, që sipas tij, ka për qëllim t’i inkurajojë vajzat të merren me matematikën dhe zbatimin e saj.
“Gara zhvillohet çdo vit në një vend të ndryshëm të Evropës dhe në të marrin pjesë rreth 60 shtete, duke i përfshirë edhe shtetet jo-evropiane që marrin pjesë si mysafirë.Fitimi i së drejtës së organizimit të EGMO 2025 është një arritje e jashtëzakonshme për Kosovën dhe një dëshmi e qartë se Kosova ka kapacitete profesionale e organizative për të qenë udhëheqëse e ngjarjeve më prestigjioze ndërkombëtare”, ka shkruar Kurti në Facebook.
Më tej, kreu i qeverisë tha se organizimi i olimpiadës është mundësi për të promovuar Kosovën si vend me vlera evropiane në të cilin vlerësohen dhe mbështeten të rinjtë e talentuar.
“Qeveria e Kosovës do të mbështesë në vazhdimësi aktivitete të tilla të rëndësishme dhe do të investojë në rritjen e mundësive për nxënësit tanë të talentuar në fushën e matematikës dhe zbatimit të saj”, shkroi Kurti./teve1.info/
