Kryeministri, Albin Kurti ka thënë se koalicioni i tyre me “Guxo” dhe “Alternativa” do ta formojë Qeverinë Kurti 3.
Kurti para mediave ka shpallur fitoren derisa ka thënë se partitë tjera edhe po të bëhen bashkë nuk mund të marrin vota sa LVV.
“Gjithçka ka shkuar sipas procedurave, falënderoj Policinë dhe organet e rendit në përgjithësi. Jemi të parët e ky është konfirmim për një qeverisje të mirë, të mbarë dhe demokratike. Koalicioni ynë do ta formojë qeverisjen tonë 3. Do t’i vazhdojë punët…Populli fitoi, fitoi Vetëvendosje. Ne jemi subjekti fitues që do të formojë qeverinë e ardhshme. Të gjithë e kanë të qartë se ata që dolën të dytët e të tretët po të mblidhen bashkë, nuk bëjnë sa ne”, ka thënë Kurti në konferncë për media, raporton teve1
Kryetarja e partisë Guxo, Donika Gërvalla, ka thënë se sot ishte një fitore e madhe për koalicionin e tyre.
“Sot kjo ditë ka shënuar një fitore të madhe për koalicionin tonë të Vetëvendosjes, partisë Guxo dhe Alternativa. Kemi rezultatet dhe mbi të gjitha këto rezultate nuk e kanë marrë në konsideratë votën e mërgatës. Do ta formojmë qeverinë së bashku”, ka thënë ajo.
Ndërsa, Mimoza Kusari –Lilia tha se lista e tyre ka avantazh në vota më shumë se dy partitë tjera ajo e dyta dhe e treta.
“Partia e parë është dukshëm në avantazh edhe me shumën e dy parive të dytës dhe të tretës. Vetëvendosjes, Guxo dhe Alternativa, pakontestueshëm kanë marrë mandatin për të formuar qeverinë e re, Qeverinë Kurti 3”, tha ajo.
