Kryeministri në detyrë i Kosovës, Albin Kurti ka kërkuar zbatimin e marrëveshjeve të arritura në Procesin e Berlinit siç janë njohja reciproke e diplomave dhe lëvizjes së lirë.
Ai ka thënë se këto jetike për suksesin e Tregut të Përbashkët Rajonal dhe Planin e Rritjes.
Kurti kështu është shprehur në takimin që ka zhvilluar mbrëmë me të Dërguarën e Posaçme të Mbretërisë së Bashkuar për Ballkanin Perëndimor, Karen Pierce.
“Në përgatitjet për mbajtjen e Samitit të ardhshëm të Procesit të Berlinit i cili do të zhvillohet në tetorin e këtij viti në Londër, kryeministri theksoi domosdoshmërinë e zbatimit të marrëveshjeve të arritura dhe rëndësinë e njohjes reciproke të diplomave dhe lëvizjes së lirë, si jetike për suksesin e Tregut të Përbashkët Rajonal dhe Planin e Rritjes”, thuhet në komunikatën e Zyrës së Kryeministrit.
Sipas komunikatës, Kurti dhe emisarja Pierce diskutuan së bashku mbi marrëdhëniet mes Kosovës dhe Mbretërisë së Bashkuar dhe mundësitë për zgjerim të bashkëpunimit duke përfshirë fusha të ndryshme, nga industria kreative dhe diplomacia deri te mbrojtja e siguria.
Siç thuhet në komunikatë, Kurti shprehu mirënjohjen për mbështetjen e palëkundur dhe të vazhdueshme të Mbretërisë së Bashkuar ndaj Republikës së Kosovës./teve1.info/
