Për Faton Hajrizin, për herë të parë u deklarua kryeministri, Kurti.
Ai pati një porosi për qytetarët e Kosovës për 39 vjeçarin, që sipas autoriteteve serbe u vra në Loznicë të Serbisë me 19 korrik.
“Ndërkohë, i ftoj qytetarët e vendit tonë të mos bien pre e euforisë së heroizimit dhe romantizimit të Faton Hajrizit. Patriot në Republikën e Kosovës, është rreshteri i Policisë së Kosovës, Afrim Bunjaku, i vrarë në Banjskë të Zveçanit. Patriotë janë 23 pjesëtarët e Policisë së Kosovës të rënë në krye të detyrës, që dëshmuan përkushtimin për shërbim deri në sakrificë”, u shpreh Kurti në mbledhjen e Qeverisë.
Megjithatë, shefi i qeverisë për rastin e Hajrizit kërkoj hetim vendor dhe ndërkombëtar.
Për Hajrizin, të mërkurën foli edhe zëvendëskryeministrja dhe ministrja e Punëve të Jashtme dhe Diasporës, Donika Gërvalla.
Ajo po thotë se bashkëpunimi në mes Kosovës dhe Serbisë është pothuajse inekzistent, pavarësisht që sipas saj kanë kërkuar që trupi i tij të kthehet në Kosovë.
“Siç e thatë bashkëpunimi jo vetëm që është i vështirë por është pothuajse in-ekzistent në të gjithë këto fusha. Ne kemi qenë shumë këmbëngulës në kërkesën që trupi i personit të vrarë, kushdo që të jetë ai ti kthehet familjes për t’u varrosur në Kosovë. Kemi shpërndarë të gjitha informacionet me kohë me të cilat kemi mundur të pajisemi gjatë kësaj kohe. Kemi pasur një mostër të shenjave të gishtërinjve të një personi, i cili pas verifikimit në Kosovë është konstatuar të jetë qytetari i Kosovës, Faton Hajrizi, mirëpo nuk kemi asnjë garancë që bëhet fjalë as për personin e vrarë, e as për ndonjë prej pretendimeve të tjera. Deri tani gjithçka që ka ndodhur në Serbi është në mjegull. S’mund t’u themi qytetarëve tanë që kemi informacione të sakta, mirëpo nuk fshehim asnjë prej informacioneve të cilat i kemi marrë sepse dëshirojmë që edhe qytetarët edhe mediet të jenë po aq të informuara ose te painformuar sa janë institucionet. Pra deri tani kjo është gjendje. Pa dashur të paragjykojë asgjë çfarë ka ndodhur në Serbi, sepse jam shumë e sigurt se nuk e dimë të gjithë të vërtetën dhe prandaj të presim se si do të rrjedhë. I kemi bërë thirrje bashkësisë ndërkombëtare dhe misioneve diplomatike, përfshirë edhe Zyrës së BE-së në Beograd që të na ndihmojnë në sqarimin e kësaj çështje dhe zbardhjen e të vërtetës”, tha Gërvalla.
Më 18 korrik një kosovar u vra në Lloznicë të Serbisë pasi ishte në kërkim për vrasjen e një polici serb dhe plagosjen e një tjetri. Serbia tha që i vrari është Faton Hajrizi, i arratisur nga burgu i Smrekonicës me 6 korrik.
Nga ajo kohë, nuk ka informacione dhe të dhëna se në cilin vend të Serbisë gjendet trupi i tij dhe kur pritet të kthehet në Kosovë për varrim.
