Kryeministri në detyrë, Albin Kurti, ka dhënë mesazhin e tij të mbështetjes për Kombëtaren e Kosovës në prag të ndeshjes me Slloveninë në Lubjanë.
Kurti tha se kjo ndeshje futbolli është momenti i shpresës, i besimit dhe i bashkimit të të gjithëve rreth djemve tanë që përfaqësojnë vendin me përkushtim dhe krenari.
“Sonte luan Kosova! Në Lubjanë, djemtë tanë luajnë ndeshjen e radhës drejt Kupës së Botës, me Slloveninë. Është koha jonë, koha e mbështetjes dhe shpresës, e besimit dhe e bashkimit. Le ta tregojmë edhe një herë se kur brohorasim njëzëri, Kosova fiton. Secili prej nesh të jetë pjesë e kësaj nate të madhe, në stadium, nëpër sheshe, në shtëpi e kudo që jemi, të gjithë bashkë për Dardanët”, shkroi Kurti në Facebook.
Ndryshe, Kombëtarja e Kosovës në futboll është gati për ndeshjen shumë të rëndësishme me Slloveninë.
Ndeshja zhvillohet të shtunën prej orës 20:45 në stadiumin “Stozhice” në Lubjanë, ndërsa është vendimtare në garën e Grupit B të kualifikimeve për Kupën e Botës 2026./teve1.info/
