Kryeministri i Kosovës, Albin Kurti ka thënë se Kosova si shtet i pavarur, sovran e demokratik kërkon të jetojë në paqe me shtetet fqinje dhe së bashku të ndërtojë një të ardhme evropiane.
Në adresimin e tij, në pritjen shtetërore me rastin e shënimit të 17-vjetorit të shpalljes së Pavarësisë së Kosovës, Kurti ka thënë se Kosova është aleat i shteteve demokratike që ndihuna në shpalljen e pavarësisë.
“Sot, Republika e Kosovës është një shtet i pavarur, sovran e demokratik e me integritet territorial. Ajo kërkon të jetojë në paqe me shtetet fqinje dhe të ndërtojë bashkë me ta një të ardhme evropiane. Kosova është partner i shteteve demokratike të botës që ndihmuan shpalljen e pavarësisë së saj: Shtetet e Bashkuara të Amerikës, vendet anëtare e Bashkimit Evropian, Mbretëria e Bashkuar, Turqia, Japonia, Kanadaja etj”, ka thënë Kurti në adresimin e tij.
Kurti ka përmendur dorëzimin e aplikimit për t’u anëtarësuar në Bashkim Evropian, angazhimin e FSK me aktivitetet e NATO-s, ku këtë vit Kosova do të jetë nikoqirë në Defender Europe 2025.
Ai ka përmendur edhe sulmet dhe pengesat e Serbisë ndaj Kosovës që nga shpallja e pavarësisë.
“Edhe pas shpalljes së pavarësisë, Kosova është përballur me shumë vështirësi e pengesa të krijuara nga lufta sistematike e hibride e së fundmi edhe kinetike e Serbisë për të na e bërë të pamundur sovranitetin dhe shtetin ligjor në të gjithë territorin e vendit tonë. Agresiviteti e shovenizmi është edhe aksion e sjellje jo vetëm qëndrim e vendim i Serbisë kundër Kosovës meqë përfshin sulme terroriste, fushata të mosnjohjes ndërkombëtare, financim të bandave kriminale e strukturave paralele, sulme mediatike etj. Ndërkaq, Forca e Sigurisë së Kosovës, ndodhet në kazerma, Serbia ka 48 baza të përparme ofenzive të ushtrisë dhe xhandarmërisë pranë e përgjatë kufirit me ne. Ne jemi përballuar suksesshëm sa herë kanë provuar, kanë dështuar dhe Republika e Kosovës ka fituar, por edhe me sakrifica të reja, siç janë policët dëshmorë Enver Zymeri dhe Afrim Bunjaku. Ata do të kujtohen përherë, krahas dëshmorëve të tjerë të kombit që i kanë paraprirë shpalljes së Pavarësisë së Kosovës”, ka thënë Kurti.
