Kryeministri ne detyrë, Albin Kurti, ka filluar t’i zbus qëndrimet.
Përmes një letre, kreu i Lëvizjes Vetëvendosje, ka shprehur gatishmëri për një koalicion të mundshëm me Lidhjen Demokratike të Kosovës.
Në këtë letër Kurti nuk ka hezituar t’ia përmend LDK-së historikun e koalicioneve me partitë e tjera përfshi Vetëvendosjen.
“Si kryetar i LVV-së dhe kryeministër në detyrë i Republikës së Kosovës, jam i interesuar dhe i vullnetshëm për marrëveshje politike me LDK-në. Në sigurisht që kemi dallime në bindje politike e në politikat qeverisëse, por koalicionet bëhen pikërisht ndërmjet atyre që kanë dallime, duke vendosur të drejtat dhe nevojat e shtetit dhe të qytetarëve si prioritet”- thuhet tutje në letër.
Në anën tjetër, kryetari i Lidhjes Demokratike të Kosovës, Lumir Abdixhiku nuk dha përgjigje të menjëhershme për një koalicion të mundshëm me Vetëvendosjen.
Ai premtoi se do jenë transparent dhe do të përgjigjen pa arrogancë.
“Më lejoni të shkojë në zyrë të shoh letrën dhe do të kthejë përgjigje me kohë. I lus edhe njerëzit tanë që gjendjen e tanishme ta trajtojnë pa arrogancë. Do të kemi përgjigje zyrtare siç i takon një partie”, tha Abdixhiku.
Abdixhikut nuk i mjaftuan as disa orë në zyre për të marrë një vendim final.
“Pritni keni durim, do të jem transparent si çdoherë tjetër. Qëndrimet e LDK-së tashmë i dini”, tha Abdixhiku.
Por, skeptik se mund të ketë një marrëveshje politike mes Lëvizjes Vetëvendosje dhe Lidhjes Demokratike të Kosovës është analisti politik, Artan Muhaxhiri.
“Në mënyrën se si ishte shkruar kjo letër ku përmenden marrëveshjet e kaluara, unë nuk shoh ndonjë perspektivë se mund të ketë ndonjë lëvizje përpara pasi siç thash më herët do duhej të kishte një qasje tjetër. Tani varet se çfarë do t’i ofrohet Lidhjes Demokratike të Kosovës por e dimë se Lumir Abdixhiku ka kërkuar postin e kryeministrit”, tha ai.
Vetëvendosje dhe Lidhja Demokratike e Kosovës kanë qenë në koalicion edhe në të kaluarën por që ishte jetëshkurtër për shkak se kjo e fundit ngriti mocion mosbesimi ndaj Qeverisë Kurti 1.
