Kryeministri i Kosovës, Albin Kurti, i ka ofruar mbështetjen e Qeverisë, Komitetit Olimpik të Kosovës në procesin e aplikimit të Kosovës për organizimin e Lojërave Mesdhetare 2030.
Ai të enjten ka vizituar KOK-un, bashkë me zëvendësministren e Kulturës, Rinisë dhe Sportit, Daulina Osmani.
“Ai u shpreh mirënjohës për punën sistematike që po bëhet në Komitetin Olimpik të Kosovës, dhe me besim se tash e tutje do të shënojmë edhe më shumë suksese nga bashkëpunimi ndërinstitucional, duke konfirmuar edhe një herë mbështetjen e Qeverisë në procesin e aplikimit të Kosovës për organizimin e Lojërave Mesdhetare 2030”, thuhet në komunikatë.
Gjatë vizitës Kurti ka parë nga afër renovimet që janë bërë në zyrat e tyre në “Shtëpinë e Sportit” në fillim të këtij viti me mbështetje të MKRS-së, dhe pati rastin të bashkëbisedojë dhe me stafin e këtij institucioni.
Presidenti i KOK, Ismet Krasniqi, falënderoi kryeministrin dhe zëvendësministren e Kulturës, Rinisë dhe Sportit, Daulina Osmani, për vizitën e sotme, të cilën e cilësoi si shumë të rëndësishme edhe për faktin që ndodhi pikërisht para vendimet që pritet të merret më 8 shtator për vendin mikpritës të Lojërave Mesdhetare 2030.
Ai gjithashtu e falënderoi kryeministrin dhe Ministrinë e Kulturës, Rinisë dhe Sportit edhe për përkrahjen që po i jep sportit, teksa u shpreh me shpresë që së shpejti do të festojmë së bashku kandidaturën e suksesshme për organizimin e Lojërave Mesdhetare, Prishtina 2030./teve1.info/