Kryeministri i Kosovës, Albin Kurti i ka falënderuar qytetarët të komunitetit serb për konvertimin e patentë-shoferëve nga ilegale në ato zyrtare të Republikës së Kosovës.
Kurti ka treguar se kanë qenë gjithsej 6509 aplikues të cilët kanë bërë konvertimin e patentë-shoferëve.
“6509 aplikime për konvertimin e patentë-shoferëve nga ilegale në ato zyrtare të Republikës së Kosovës. Vetëm në katër komunat në veri të shtetit tonë, u konvertuan 5732 patentë-shoferë, prej të cilave 2018 në Leposaviq, 1576 në Mitrovicën Veriore, 1177 në Zveçan dhe 961 në Zubin Potok.
Afati për regjistrimin e tyre, nisi më 9 maj, dhe ishte i paraparë deri më 9 gusht. Për shkak të kërkesave të shumta dhe interesimit të lartë për konvertimin e patentë-shoferëve, e kemi shtyrë të njëjtin për 2 javë, deri ditën e djeshme më 23 gusht. Kjo periudhë më shumë se 3 mujore e konvertimit, kaloi pa asnjë incident apo ankesë”, ka shkruar Kurti në Facebook.
Derisa, ai i ka falënderuar edhe zyrtarët e institucioneve në zyrat e regjistrimit për punën e tyre.
“Qytetarët tanë nga komuniteti serb kanë bërë një hap të rëndësishëm drejt integrimit, duke iu përgjigjur në masë thirrjes për aplikim për konvertimin e këtij dokumenti.
I falënderoj të gjithë qytetarët tanë të cilët e shfrytëzuan pozitivisht këtë mundësi, si dhe zyrtarët e institucioneve tona në zyrat e qendrat e regjistrimit, për punën e tyre dhe asistimin e aplikuesve në këtë proces”, ka thënë kryeministri.
Ndryshe, të premten, ka përfunduar afati për aplikimin e konvertimit te patentë shoferit të lëshuar nga strukturat ilegale serbe, në atë të Kosovës. Veton Elshani zëvendësdrejtor i Policisë për rajonin e veriut, thotë se nga e hëna do të fillohet me gjoba që variojnë nga 500 deri në 1500 euro. Qytetarët serbë thanë të shtunën se ky vendim duhet të respektohet./teve1.info/
