Duke folur për zgjedhjet e 23 prillit, kryeministri i vendit, Albin Kurti tha se të njëjtat kanë qenë të qeta dhe paqësore.
Në mbledhjen e Qeverisë, Kurti theksoi se “vota e munguar ishte mungesë e vullnetit të lirë”, teksa potencoi se fushata të tilla të Beogradit janë të shpeshta, dhe kjo sipas tij, nuk do të thotë që janë normale dhe të pranueshme, përcjell teve1.info
“Nuk pati asnjë incident. Ishin të qeta dhe paqësore. Frikësimet, linçimet, trysnia dhe shantazhi nga Beogradi zyrtar, ndikoi drejtpërdrejt në daljen e ulët të qytetarëve tanë serbë në këto zgjedhje. Vota e munguar, ishte mungesë e vullnetit të lirë, jo shprehje e vullnetit politik. Fushata të tilla kërcënuese të Beogradit zyrtar ndaj serbëve lokalë, veçanërisht në katër komunat tona në veri të vendit, janë të shpeshta dhe të vazhdueshme. Por, veç pse diçka ndodh shpesh dhe vazhdimisht, nuk do të thotë që është normale dhe e pranueshme. Të premten e kaluar, kryetari i zgjedhur i Komunës Veriore të Mitrovicës, Erden Atiq, bëri betimin e tij. Kjo është normale, pas një procesi zgjedhor. E nënkryetarja e komunës u emërua Katarina Axhançiq, që vjen nga radhët e komunitetit serb. Edhe kjo është normale për këtë komunë”, deklaroi ai.
Por, sipas tij, ajo çfarë nuk është normale, është që katër komunat në veri kanë qenë pa kryetarë për mbi gjashtë muaj.
“Kanë kaluar mbi 6 muaj prej kur këto katër komuna mbetën pa kryetarë. Dy prej tyre edhe pa kuvende. E banorët atje, pa shërbime komunale. Kjo nuk është normale. Veprimet tona kanë në qendër funksionalizimin demokratik të institucioneve shtetërore dhe garantimin e shërbimeve publike për të gjithë qytetarëve pa dallim. Kjo nuk është zgjedhje”, shtoi kreu i Ekzekutivit. /Teve1.info/