Kurti tha se ka bërë thirrje që regjistrimin e popullsisë mos ta trajtojmë vetëm si veprim i natyrshëm por si veprim kombëtar e historik, teksa shtoi se shqiptarët në Preshevë, Medvegjë e Bujanoc nuk trajtohen në mënyrë të barabartë me të tjerët, shkruan teve1.info
“Në rrethana normale e në vende me demokraci të zhvilluar e liri të garantuara, ky proces do të trajtohej si proces i natyrshëm, por në të tilla rrethana nuk jetojnë shqiptarët në Serbi. Ata përballen me mosintegrim e me shkelje të të drejtave elementare të njeriut. Sot, kur po përfundon një proces me interes të veçantë edhe për Qeverinë e Republikës së Kosovës, informacionet që vijnë nga Presheva, Medvegja e Bujanoci, janë se përkundër pengesave të shfaqura gjatë procesit të regjistrimit, shqiptarët janë aktivizuar në maksimum për një muaj rresht, që të regjistrohen të gjithë, e edhe ata që janë me banim të përkohshëm në Kosovë e diasporë”, ka shkruar Kurti.
Kryeministri Kurti kërkoi të vëzhgohet ky proces nga bashkësia ndërkombëtare, pas deklaratave të presidentit të Serbisë, Aleksandër Vuçiq i cili ka thënë se janë fryer shifrat nga shqiptarët.
E që sipas Kurtit këto deklarata ende pa përfunduar procesi i regjistrimit dëshmojnë që ky proces për shqiptarët ka rëndësi historike dhe kombëtare.
“Jemi të vetëdijshëm që edhe përpunimi i të dhënave, proces në të cilin shqiptarët nuk do të kenë qasje, është shumë i rëndësishëm. Duke pasur parasysh deklaratat skandaloze të kreut të Serbisë se shifrat e paraqitura, ende pa përfunduar procesi, janë shifra të fryera nga shqiptarët, kërkojmë vëzhgim nga bashkësia ndërkombëtare. Këto deklarata dëshmojnë se pse procesi i regjistrimit të popullsisë e pasurive, për shqiptarët ka rëndësi historike e kombëtare”, ka shkruar Kurti në Facebook.
Tutje Kurti falënderoi punëdhënësit në Kosovë të cilët i kanë liruar punëtorët nga puna për ditët që u janë nevojitur qytetarëve për regjistrim, teksa bëri thirrje që edhe sot të veprojnë njësoj./teve1.info
