Kryeministri i Kosovës, Albin Kurti, ka takuar drejtorin e Agjencisë Ndërkombëtare të Energjisë, Fatih Birol, raporton teve1.info
Sipas komunikatës së lëshuar nga Qeveria e Kosovës, në këtë takim të zhvilluar në Mynih të Gjermanisë, Kurti dhe Birol kanë diskutuar për investimet në energjinë e ripërtërishme në Kosovë.
“Takimet në Mynih, Kryeministri i Republikës së Kosovës, Albin Kurti i vazhdoi me Drejtorin Ekzekutiv të Agjencisë Ndërkombëtare të Energjisë, Fatih Birol. U bisedua për sektorin e energjisë në Kosovë dhe potencialin që vendi ynë ka në fushën e energjisë së ripërtërishme. Kryeministri Kurti theksoi planet e Qeverisë për investime në energji të ripërtërishme dhe për Strategjinë Kombëtare të Energjisë 2022-2031”, thuhet në komunikatë.
Sipas njoftimit, Kurti e njoftoi Birol për punën e Qeverisë dhe progresin e shënuar në indikatorët ekonomikë dhe demokratikë.
Ai theksoi mundësitë që ofron Kosova për investitorët e huaj, si dhe për masat e ndërmarra në rritjen e efiçencës energjetike dhe ruajtjen e çmimit të përballueshëm për qytetarë.
Në takim u diskutua edhe për mundësitë dhe format e mundshme të bashkëpunimit ndërmjet Qeverisë së Republikës së Kosovës dhe Agjencisë Ndërkombëtare të Energjisë.
